Дар толори варзишии муассисаи таҳсилоти миёнаи умумии рақами 80-и ноҳияи Ёвон бо дастгирии мақомоти иҷроияи ҳокимияти давлатии ноҳия мусобиқаи ҷумҳуриявӣ оид ба ҷудо миёни наврасон баргузор гардид.

Бино ба иттилои Бахши кор бо ҷавонон ва варзиши ноҳияи Ёвон, мақсад аз баргузории мусобиқаи мазкур муайян кардани беҳтарин варзишгарон, тарғибу ташвиқи ҷудо дар Ҷумҳурии Тоҷикистон, мустаҳкам намудани алоқаи дӯстӣ байни варзишгарон ва баланд бардоштани маҳорати варзишӣ ба шумор меравад.

Дар маросими кушодашавии мусобиқаи ҷумҳуриявӣ оид ба ҷудо миёни наврасон муовини раиси ноҳия Абдуллозода Саёҳат иштирок намуда ба роҳбарияти Кумитаи кор бо ҷавонон ва варзиш ва Федератсияи ҷудои изҳори сипос ва миннатдорӣ баён намуд.

Гуфта мешавад, ки дар фарҷоми мусобиқа ғолибони ҳамаи вазнҳо бо диплом ва туҳфаҳои таъсиснамудаи кумитаи тадорукот сарфароз гардонида шуданд.

Инчунин, дар маросими ифтитоҳи мусобиқаи мазкур барномаи рангини фарҳангӣ аз ҷониби ҳунармандони шуъбаи фарҳанги ноҳия манзури ҳозирин гардонида шуд.

Фарзонаи УМАРАЛӢ, “ҶТ”