Тибқи иттилои сомонаи расмии Федератсияи футболи Тоҷикистон рӯзи 27 январи соли ҷорӣ маросими қуръакашии Лигаи қаҳрамонҳои КФО-2021 ва Ҷоми КФО-2021 баргузор хоҳад шуд.

Дар мусобиқаҳои имсолаи футболи Осиёӣ се бошгоҳи футболи Тоҷикистон – “Истиқлол”, “Равшан” ва “Хуҷанд” баромад мекунанд.

Маврид ба зикр аст, ки қаҳрамони феълии кишвар – “Истиқлол”-и Душанбе бори аввал дар марҳилаи гурӯҳии Лигаи қаҳрамонҳои КФО баромад мекунад. Марҳилаи гурӯҳии ин мусобиқаи асосии бошгоҳии Осиё дар минтақаи Ҷануб дар шакли мутамарказонидашуда аз 14 то 30 апрел ва дар минтақаи Шарқ аз 21 апрел то 7 май доир хоҳад шуд.

Барандаи Ҷоми Тоҷикистон дастаи “Равшан”-и Кӯлоб ва ҷоизадори медалҳои нуқраи қаҳрамонии кишвар дастаи “Хуҷанд”-и шаҳри Хуҷанд дар Ҷоми КФО баромад мекунанд. Бозиҳои марҳилаи пешакии Ҷоми КФО-2021 дар минтақаи Марказӣ, ки аз як бозӣ иборат мебошанд, рӯзҳои 6-7 апрел ва бозиҳои марҳилаи плей-офф 20-21 апрел баргузор хоханд шуд. Марҳилаи гурӯҳии Ҷоми КФО дар Осиёи Марказӣ, дар шакли мутамарказонидашуда аз 14 то 20 май доир мешавад.

Қиёмиддин МАҲМАДҶОНОВ, “ҶТ”