Дар Федератсияи футболи Тоҷикистон 13 апрел маросими қуръакашии Чемпионати Тоҷикистон оид футбол миёни дастаҳои лигаи якум баргузор шуд.

Гуфта шуд, ки дар мавсими нави лигаи якум, ки 24 апрел оғоз мегардад, он дар ду марҳила баргузор гардида, дар он 12 даста иштирок мекунад, ки инҳоянд: “Регар-ТадАЗ” (Турсунзода), “Панҷшер” (Ҷалолидини Балхӣ), “Саройкамар” (Панҷ), “Исфара” (Исфара), “Барқчӣ” (Ҳисор), “Ваҳдат” (Ваҳдат), “Ҳулбук” (Восеъ), “Моҳир” (Ёвон), “Равшан” (Зафаробод), “Ҳосилот” (Фархор), “Динамо” (Душанбе) ва “Пахтакор” (Ҷаббор Расулов).

Дар асоси рақамҳои тартибӣ, ки дар қуръакашӣ маълум гардид, ҷадвали бозиҳо тартиб дода мешавад. Ва дар асоси низомнома пас аз натиҷагирии мавсим, ду дастаи беҳтарин ҳуқуқ пайдо мекунанд, ки соли оянда дар лигаи олӣ бозӣ кунанд.

И. АМАКҶОНОВ, “ҶТ”