Дар ҷамоати деҳоти Палдораки ноҳияи Мастчоҳ зимни сафари хеш раиси вилояти Суғд Раҷаббой Аҳмадзода дар маросими ифтитоҳи майдончаҳои варзишии замонавие, ки барои гузаронидани бозии футболи хурд ва волейбол мутобиқ гардонида шудааст, иштирок намуд.

Майдончаҳои варзишӣ бо мақсади ҷалби ҷавонону наврасон ба варзиш ва дар доираи корҳои ободониву бунёдкорӣ ба истиқболи 30-солагии Истиқлолияти давлатии Ҷумҳурии Тоҷикистон аз ҷониби соҳибкори ватандӯст Устосафар Олимов бо харҷи зиёда аз  500 000 сомонӣ сохта шуда, дорои шароитҳои замони муосир мебошад.

Раиси вилоят Раҷаббой Аҳмадзода зимни суҳбат бо сокинони ҷамоат аз вусъати корҳои ободониву созандагӣ дар ноҳияи Мастчоҳ ёдовар шуда, иқдоми соҳибкорро ҷиҳати ҷалби ҷавонони маҳал ба варзиш муфид арзёбӣ кард.

Таъкид гардид, ки ҷавонону наврасон ояндаи миллату давлат мебошанд ва солиму дар руҳияи ватандӯстӣ тарбия намудани онҳо вазифаи муқаддаси ҳар сокини кишвар аст.