Имрӯз, 21 август дар меҳмонхонаи “Ҳаятт Реҷенс”-и Душанбе, нишасти хабарӣ пеш аз бозии аввали даври ниманиҳоии байниминтақавии Ҷоми КФО (Конфедератсияи футболи Осиё) - 2017 миёни дастаҳои “Истиқлол”-и Тоҷикистон ва “Серес Негрос”-и Филиппин баргузор гардид.

Муҳсин Муҳаммадиев сармураббии дастаи “Истиқлол”-и Душанбе дар суҳбат бо рӯзноманигорон аз бозии фардо ва дар бораи тими рақиб чунин ибрози андеша намуд. “Мо барои бозии фардо мисли ҳарвақта омода ҳастем ва барои бозии ниҳоӣ се –чор қадам мондааст, аз ин лиҳоз мо барои ғалаба талош меварзем. Рақиб бисёр ҷидди омода шудааст ва ман фикр менамоям дар ин мавқеъ ягон даста тасодуфан набаромадааст, кӯшиш менамоем бозии хуб нишон диҳем”.

Ристо Видакович мутахассиси испанӣ бозии фардоро барои дастааш як имконияти хуб ҳисобид, зеро бозии ҷавобиро дар хонаашон баргузор менамоянд ва метавонанд мавқеи заифи ҳарифро дар даври аввал омӯхта дар бозии дуюм истифода баранд.

“Дастаи “Истиқлол” ҳарифи пурқувват аст, зеро рақиб ғолиби бозиҳои минтақавист мо бозиҳояшро тамошо намудем ва фардо талош мекунем дар майдон натиҷаи хуб ба даст орем”, - мегуяд Ристо Видакович.

Дар охир сармураббии дастаи “Истиқлол” Муҳсин Муҳаммадиев ва дарвозабон Никола Стошич тамоми мухлисони футболи тоҷикро бо як сухан “мо фардо дар Варзишгоҳи марказии Ҳисор интизори 12-умин бозингари “Истиқлол” ҳастем, ҳамаи мухлисонро барои дастгири таклиф менамоем ва барои ғалаба талош меварзем”, даъват намуданд.

Ёдовар мешавем, рақобати аввали даври ниманиҳоии байниминтақавии Ҷоми КФО (Конфедератсияи футболи Осиё) - 2017 миёни дастаҳои “Истиқлол”-и Душанбе ва “Серес Негрос”-и Филиппин 22-юми август дар Варзишгоҳи марказии шаҳри Ҳисор соати 19:00 шуруъ мешавад. Бозии ҷавобӣ 12-уми сентябр дар шаҳри Баколоди Филиппин барпо мегардад.

Шаҳбози АСОМИДДИН, “ҶТ”