Дар робита ба сазовор ва арзанда таҷлил намудани ҷашни 33-юмин солгарди Истиқлоли давлатии Ҷумҳурии Тоҷикистон имрӯзҳо дар манотиқи гуногуни кишвар чорабиниҳои мухталифи варзишӣ ташкил ва баргузор гашта истодааст. Чорабинии варзишӣ аз рӯи намуди футболи хурд бо усули “деҳа ба деҳа”, яке аз он чорабиниҳоест, ки дар аксари манотиқи кишвар ҷараён дорад.

Ин навбат тибқи нақшаи тасдиқнамудаи Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо Мақомоти иҷроияи ҳокимияти давлатии ноҳияи Кӯҳистони Мастчоҳ мусобиқаи футболи хурд дар ноҳияи мазкур ташкил ва баргузор гашта истодааст.

Дар ин бора аз Бахши кор бо ҷавонон ва варзиши ноҳияи Кӯҳистони Мастчоҳ иттилоъ доданд.

Мувофиқи иттилои манбаъ мусобиқаи мазкур дар робита ба таҷлили ҷашни соҳибистиқлолии кишвар ташкил шуда, ҳамчунин, дар рушд ва оммавигардонии варзиш ва тарғиби тарзи ҳаёти солим миёни ҷомеа саҳми басо муҳим хоҳад гузошт.

Ҳамчунин дар ноҳияи мазкур дар баробари футбол аз дигар навъҳои варзиш низ мусобиқаҳо бахшида ба ҷашни Истиқлол ташкил ва баргузор гашта истодааст, ки мусобиқаи шашка ва шоҳмот байни маҳалаҳо ва деҳаҳо мисоли ин гуфтаҳост.