Дар шаҳри Хуҷанд баҳри сазовор таҷлил намудани 30 - солагии Истиқлолияти давлатии Ҷумҳурии Тоҷикистон мусобиқаи шаҳрӣ оид ба футбол байни варзишгарони солҳои таваллудашон 2008 - 2009 оғоз гардид.

Мусобиқа тибқи нақшаи Федератсияи футбол ва Бахши кор бо ҷавонон ва варзиши шаҳри Хуҷанд баргузор гардида, дар ин синну сол зиёда аз 200 нафар футболбозони наврас дар ҳайати 12 даста байни ҳам қувваозмоӣ менамоянд.

Мусобиқаи мазкур дар майдони футболи Муассисаи давлатии мактаби варзишии рақами 1-и шаҳр доир гардида, он тибқи қоидаҳои амалкунандаи Федератсияи байналмилалии футбол гузаронида мешавад.

Дар бозии нахустин дастаҳои футболбозони “Хуҷанд” ва “Сомон” рақобат намуда, он бо ҳисоби 2:0 ба фоидаи дастаи “Сомон” анҷом ёфт.

Мақсад аз баргузории мусобиқа ин пеш аз ҳама рушди тарбияи ҷисмонӣ ва варзиш, тарғиби тарзи ҳаёти солим, густариши намуди футбол ва ҷалби бештари наврасону ҷавонон ба ин намуди варзиш ба ҳисоб рафта, он тибқи тақвими мусобиқа то 15 июли соли ҷорӣ идома меёбад.