ВАРЗИШ
Ҷумъа 22 Октябр 2021 03:10
8131
Федератсияи тенниси Тоҷикистон бо пешниҳоди Федератсияи ҷаҳонии теннис аз соли 2015 инҷониб ҳуқуқи баргузории тамоми мусобиқаҳои байналмилалиро доро мебошад.

То ин муддат Федератсияи тенниси кишвар ҳар соле аз 4 то 6 мусобиқаи байналмилалиро ташкил намуда, дар шаҳрҳои Душанбе ва Хуҷанд варзишгарони кишварҳои хориҷаро ҷамъ меоварад. Федератсия тасмим гирифтааст, соли равон 13 мусобиқаи байналмилалиро баргузор намояд, ки аллакай дар ин нимсола 4 мусобиқаи банақшагирифташуда, доир гардидааст.

Мо оид ба ташкили мусобиқаҳои байналмилалӣ дар дохили ҷумҳурӣ, таъсири он ба тенниси кишвар ва бурду бохти варзишгарон дар мусобиқаҳои сатҳи байналмилалӣ бо сармураббии тими мунтахаби Ҷумҳурии Тоҷикистон оид ба теннис Абдурасул Муҳиддинов суҳбат намудем, ки фишурдаи он пешкаш мегардад.

- Соли шашум аст, ки Тоҷикистон мизбони мусобиқаҳои байналмилалист. Мегуфтед, ки ташкил ва баргузории ин мусобиқаҳо ба тенниси тоҷик чӣ таъсир мерасонад?

- Муҳимияти баргузории чунин мусобиқаҳо пеш аз ҳама ин аст, ки варзишгарони мо бехароҷот дар ватани худ баромад намуда, холҳои байналмилалиро соҳиб мешаванд. Ҳамчунин, пас аз баргузор гардидани ҳар як мусобиқаи байналмилалӣ дар кишвар мушоҳида мешавад, ки варзишгаронамон дар асоси рақобатҳои карда ва таҷрибаи бардоштаашон хеле беҳтар мегарданд. Дар ин баробар мураббиён низ чизҳои наве меомӯзанд, ки барои фаъолияти минбаъдаашон заминаи хуб аст. Ин аз он шаҳодат медиҳад, ки тенниси тоҷик низ ҳамасола аз баргузорӣ ва бардошт аз мусобиқаҳои байналмилалӣ марҳила ба марҳила рушд намуда истодааст. Манфиати дигараш он аст, ки ҳар як варзишгаре, ки ҷиҳати иштирок дар мусобиқаҳои сатҳи байналмилалӣ ба кишвари мо ташриф меорад, дар баробари рушду такомули таҷрибаи варзишии варзишгаронамон боз ба соҳаи сайёҳӣ ва иқтисоди мамлакат низ метавонад, таъсири мусбат расонад.

- Дар шаш моҳи соли ҷорӣ аллакай 4 мусобиқаи байналмилалӣ дар пойтахти мамлакат баргузор гардид. Дар ин мусобиқаҳо варзишгарони тоҷик ба чӣ дастовардҳо ноил гардиданд?

- Натиҷаҳоро метавон хуб арзёбӣ намуд, вале ҳамоно қонеъкунанда нестанд. Зеро теннисбозони мо ҳоло ҳам ба сабқатҳои байналмилалӣ омодагии хуб надоранд. Аз ҷумла варзишгарони муваффақамонро метавон ангуштшумор гуфт. Давоми баргузории мусобиқаҳои байналмилалӣ натиҷаи беҳтаринро аз варзишгаронамон Исамҷон Шарифов ба даст овард. Ӯ дар ду мусобиқаи охир, ки аввали моҳи июн доир гардиданд, дар тенниси ҷуфтӣ сазовори мақоми аввал ва дар тенниси инфиродӣ мақоми сеюмро ба даст оварда, бо медалу ифтихорнома ва холҳои рейтингии Федератсияи тенниси байналмилалӣ сазовор гардид. Дар ин баробар дигар варзишгаронамон низ миёни наврасону ҷавонон мақомҳои ифтихориро ба даст оварданд. Дар маҷмӯъ, теннисбозони тоҷик аз 4 мусобиқаи баргузоргардидаи байналмилалӣ дар кишвар соҳиби 7 медал шуданд.

- Омили дастовардҳои ками теннисбозони тоҷик дар чист?

-Ягона мушкилие, ки метавонад сабабгори камнатиҷагии варзишгарони мо дар сабқатҳои байналмилалӣ бошад, пеш аз ҳама иштироки ками онҳо дар мусобиқаҳои байналмилалист. Зеро ҳар як варзишгар таҷрибаи худро маҳз дар заминаи иштироки зиёд дар мусобиқаҳои байналмилалӣ мукаммал мегардонад ва дар такя ба ана ҳамон таҷрибаи доштаи хеш устуворона мубориза мебарад. Бо ин мақсад мо тасмим гирифтем, ки баргузории чунин мусобиқаҳоро дар кишвар бештар ба роҳ монем ва ба ин васила таҷрибаи варзишгарони худро мукаммал намуда, солҳои баъдӣ натиҷаҳои арзандатареро соҳиб гардем.

- Оё мушкилие ҳаст, ки монеи рушди тенниси тоҷик бошад?

-Аслан фикр мекунам соҳае нест, ки мушкилӣ надошта бошад. Аммо ҳар яки онҳо дар навбати худ боз ҳаллу фасл мегарданд. Хушбахтона, он камбудиҳое, ки монеи рушди тенниси тоҷик низ буданд, оҳиста – оҳиста ҳалли худро пайдо намудаву аз байн рафта истодаанд. Аллакай шароитҳо дар ин самт хеле беҳтар гардидаву толорҳои варзишӣ низ рӯз аз рӯз афзоиш ёфта истодаанд. Танҳо моро мебояд ба таври комил тамрин намуда, барои мусобиқаҳои минбаъда омодагии ҷиддӣ гирем. Ҳамзамон машқҳои дастаҷамъиро зиёд намуда, сафарбарнамоии мураббиён ва варзишгаронро ба мусобиқаҳои беруна бештар ба роҳ монем.

- Мусобиқаи минбаъдае, ки ба он омодагӣ гирифта истодаед, кадом аст?

- Яке аз мусобиқаҳои ҷолибе, ки ба ҷадвали мусобиқаҳои байналмилалӣ ворид гардидаву тӯли 10 соли охир баргузор мешавад, ин “Ҷоми Президенти Тоҷикистон” оид ба теннис аст, ки онро муҳаррики ҳаракатдиҳандаи тенниси тоҷик низ гуфтан мумкин аст. Ҳамасола бо шарофати ин мусобиқа варзишгарони зиёде аз дигар мамлакатҳои ҷаҳон низ иштирок ва ҳунарнамоӣ мекунанд, ки теннисбозони мо низ аз он барои худ бардоштҳои зиёд мегиранд. Айни ҳол мо ҳама омодагии худро барои баргузории ин мусобиқаи сатҳи байналмилалӣ дида истодаем, ки қарор аст моҳи августи соли равон баргузор гардад.

- Ба ояндаи тенниси тоҷик метавон умед баст?

- Мо боварӣ дорем, ки тайи 3 ё 4 соли оянда аз кишвар варзишгароне омода мегарданд, ки парчами Тоҷикистонро миёни дигар кишварҳои олам баланд бардоштаву медалдори Бозиҳои олимпӣ хоҳанд шуд.

Мусоҳиб
Исфандиёр
АМАКҶОНОВ, “ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
27 28 29 30 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Октябр 2021 c.