ВАРЗИШ
Ҷумъа 29 Март 2024 04:15
Дастаи “Истиқлол”- и шаҳри Душанбе ва “Регар-ТадАЗ”-и шаҳри Турсунзода бозии нахустини худро дар даври 15-уми марҳилаи сеюми мусобиқаи қаҳрамонии футболи Тоҷикистон миёни дастаҳои лигаи олӣ, ки рӯзи 3-юми август баргузор гардид, бо ғалаба анҷом доданд.
Тими “Истиқлол”-и шаҳри Душанбе дар Варзишгоҳи марказии шаҳри Ҳисор дастаи “Вахш”-и шаҳри Қӯрғонтеппаро қабул намуда, бо ҳисоби 1:0 мағлуб намуд. Голи ягонаи дидорро дар дақиқаи 52-юм легионери русиягӣ Дмитри Барков ба сомон расонд.
Бозии дигари ин давр дар Варзишгоҳи “Талко-Арена”-и шаҳри Турсунзода миёни тимҳои “Регар-ТадАЗ”-и шаҳри Турсунзода ва “Барқчӣ”-и шаҳри Ҳисор баргузор гардид. Дар ин дидор соҳибони майдон бо ҳисоби 1:0 дастболо гардиданд. Голро дар дақиқаи 28-ум пас аз партофти кунҷӣ, нимҳимоятгари меҳмонон Саидмухтор Азимов ба дарвозаи дастааш зад.
Ду бозии дигари даври 15-ум, рӯзи 5-уми август, баргузор мегардад. Дар ин рӯз дастаи “Ҳосилот”-и ноҳияи Фархор дар майдони худ бо тими ССКА “Помир”-и шаҳри Душанбе вориди майдон мешаванд. Дастаи “Хуҷанд”-и шаҳри Хуҷанд бошад тими “Панҷшер”-и ноҳияи Ҷалолиддини Балхиро қабул менамояд.
Дар ҳоли ҳозир дастаи “Истиқлол”-и шаҳри Душанбе, ки дар 14 бозӣ 36 хол ба даст овардааст, садрнишини ҷадвали мусобиқа мебошад. Дар ҷойи дуюм дастаи “Хуҷанд”-и шаҳри Хуҷанд бо 24 имтиёз ва дар зинаи сеюм тими ССКА “Помир”-и шаҳри Душанбе бо 22 хол ҷойгир шудаанд.
Ёдовар бояд шуд, ки мусобиқаи имсола миёни дастаҳои лигаи олӣ дар шакли нав аз се марҳила иборат буда, ҳар як тим 21 бозигӣ анҷом медиҳад. Бар асоси дастури мусобиқа дастае, ки дар ҷадвал зинаи охиринро ишғол менамояд, лигаи олиро тарк менамояд. Тиме, ки мақоми пеш аз охирро, яъне ҳафтумро соҳиб мешавад, барои нигоҳ доштани мавқеаш дар лигаи олӣ бо ҷоизадори нуқраи лигаи аввал ду бозӣ баргузор менамояд.
Мавқеи дастаҳо дар ҷадвали мусобиқа
Ҷ ДАСТАҲО Б Ғ М Б Т/т И
1 “Истиқлол” (Душанбе) 14 11 3 0 43-7 36
2 “Хуҷанд” (Хуҷанд) 14 7 3 4 28-12 24
3 ССКА “Помир” (Душанбе) 14 5 7 2 10-8 22
4 “Регар-ТадАЗ” (Турсунзода) 15 4 5 6 10-15 17
5 “Барқчӣ” (Ҳисор) 14 4 4 6 9-16 16
6 “Ҳосилот” (Фархор) 14 4 3 7 13-29 15
7 “Панҷшер” (Ҷалолиддини Балхӣ) 14 4 2 8 17-28 14
8 “Вахш” (Қӯрғонтеппа) 15 2 5 8 9-24 11
Нишонзанҳо: Манучеҳр Ҷалилов (“Истиқлол”) – 13 тӯб, Дилшод Бозоров (“Хуҷанд”) – 8 тӯб, Фарҳод Тоҳиров (“Хуҷанд”) – 7 тӯб.
Даври 15-ум
3 август (панҷшанбе)
“Истиқлол” – “Вахш” 1-0
“Регар-ТадАЗ” – “Барқчӣ” 1-0
5 август (шанбе)
“Ҳосилот” – ССКА “Помир”
“Хуҷанд” – “Панҷшер”
Оғози бозиҳо – соати 17:30
Шаҳбози АСОМИДДИН, “ҶТ”
Эзоҳи худро нависед