Имрӯз, 8 сентябр, дар Донишкадаи тарбияи ҷисмонии Тоҷикистон ба номи ҷаҳонпаҳлавон Саидмуъмин Раҳимов бахшида ба даври сеюуми Фестивали бозиҳои миллии варзишӣ, ки аз 8 то 10 сентябри соли ҷорӣ бахшида ба Рӯзи Истиқлолияти давлатӣ баргузор мешавад, конфронси ҷумҳуриявии илмӣ–амалӣ баргузор гашт.

Дар Конфронс Ризо Назарзода, муовини якуми раиси Кумитаи кор бо ҷавонон ва варзиш, Шодӣ Сафар, ректори Донишкадаи тарбияи ҷисмонӣ, Табаралӣ Ғаниев, профессори Донишгоҳи миллии Тоҷикистон, роҳбарони клубҳои варзишии кишвар ва дигар намояндагони соҳаи варзиши Ҷумҳурии Тоҷикистон иштирок намуданд.

Шодӣ Сафар ҳозиринро нахуст ба ҷашни Истиқлолияти давлатӣ ва оғози марҳилаи сеюуми Фестивали бозиҳои миллии варзишӣ табрик намуда, ба кори конфронс ҳусни оғоз бахшид.

Ризо Назарзода, муовини якуми раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон иброз дошт, ки “Ҳайати тадорукоти Фестивали бозиҳои миллии варзишӣ давоми як сол ба мақсадҳои дар пеш гузоштаи худ расид ва аз ин пас, тибқи нақша, бозиҳои миллии варзиширо шуруъ аз гӯштини миллӣ дар сатҳи ҷаҳон муаррифӣ мекунем”.

Дар рафти конфронс ҳамчунин мутахассисони соҳаи варзиши кишвар фикру ақидаҳои худро баҳри дар оянда ривоҷу равнақ додан ва ҷаҳонӣ намудани бозиҳои мазкур пешниҳод намуданд. Аз ҷумла Устоди варзиши собиқ Иттиҳоди Шӯравӣ Шайдулло Исоев пешниҳод намуд, ки бозиҳои миллии варзишӣ дар шакли китоб чоп шуда, дар мактабҳои миёна ва макотиби олии кишвар моҳият ва хусусиятҳои онҳо фаҳмонида шавад. Дар робита ба ин Ризо Назарзода афзуд, ки бо як мактуби расмӣ ба Вазорати маориф ва илми Ҷумҳурии Тоҷикистон пешниҳод шудааст, ки дар тамоми донишкадаю донишгоҳҳои кишвар дар заминаи факултети варзиш кафедраи бозиҳои миллӣ варзишӣ ташкил карда мешавад. Дар назар аст, ки мутахассисони соҳа солҳои баъдӣ баҳри ҷаҳонӣ намудани намудҳои варзиши миллӣ фестивали бозиҳои ориёиро таъсис диҳанд.

Тавре иттилоъ дода шуд, баҳри ҷаҳонӣ намудани гӯштини миллӣ соли 2018 аз рӯи ин намуди варзиши миллӣ бо иштироки чор давлати қораи Осиё дар шаҳри Душанбе мусобиқаи байналмилалӣ баргузор карда мешавад.

Марҳилаи сеюуми Фестивали бозиҳои миллии варзиширо баъди ҷамъбасти кори конфронс ҷавгонбозони шаҳри Душанбе бо тими Хуҷанд дар варзишгоҳи Донишкадаи тарбияи ҷисмонӣ ба номи Саидмуъмин Раҳимов оғоз намуданд.

Ёдовар мешавем, ки маҳз бо мусоидати бевоситаи Рустами Эмомалӣ, раиси шаҳри Душанбе ва президенти Федератсияи футболи Тоҷикистон, 17 сентябри соли 2016, дар заминаи баргузории мусобиқаи ҷумҳуриявии гӯштини миллӣ бахшида ба 25-солагии Истиқлолияти давлатии Ҷумҳурии Тоҷикистон, нахустин Фестивали бозиҳои миллии варзишӣ (намоишӣ) дар шаҳри Душанбе доир гардида буд.

Фестивали бозиҳои миллии варзишӣ шуруъ аз соли 2017 ҳамасола дар се марҳила (маҳаллӣ, минтақавӣ ва миллӣ): дар остонаи таҷлили иди байналмилалии Наврӯз (марҳилаи якум), Ваҳдати миллӣ (марҳилаи дуюм) ва ҷашни Истиқлолияти давлатӣ (марҳилаи сеюм) доир карда мешавад, ки роҳбарии онро президенти Федератсияи футболи Тоҷикистон Рустами Эмомалӣ ба уҳда дорад.

Шодихони НАЗАР, “ҶТ”