Меҳроҷ Камолов варзишгари муваффақи тоҷик аз Чемпионати кушод оид ба ҷиу-ҷитсу, ки дар шаҳри Гуанҷои Ҷумҳурии Мардумии Чин доир гардид, бо 4 медали тилло ба Ватан баргашт. Чемпионати мазкур аз 6-ум то 8-уми январи соли ҷорӣ баргузор гардида, Меҳроҷ дар ду вазн 80 кг аз намуди ҷиу-ҷитсу ва 82 кг аз намуди Гран- При баромад намуда, дар умум соҳиби 4 медали тилло шуд.

Меҳроҷ соли 1998 дар ноҳияи Восеъ таваллуд шудааст. Соли 2018 мактаби миёнаи ноҳияи Восеъро хатм намуда, худи ҳамон сол ҳуҷҷатҳояшро ба Донишгоҳи технологии шаҳри Пекини Чин ба ихтисоси меъморӣ супорида, айни замон донишҷӯйи курси панҷум мебошад. Дорандаи 24 медал аз мусобиқаҳои ҷумҳуриявию байналмилалӣ аст. Перомуни фаъолияти варзишиаш бо ӯ суҳбате оростем, ки фушурдаи онро манзури хонанда мегардонем.

- Меҳроҷ аввалан 4 медали тиллои Чемпионати кушод оид ба ҷиу-ҷитсу бароят муборак бошад.

- Ташаккури зиёд!

- Ҳамсони кӣ шудан мехостед?

- Бештар мехоҳам, ҳамсони Леандро Ло, яке аз варзишгари муваффақи бразилиягӣ бошам. Ин варзишгари нотакрор айни замон дар қайди ҳайёт нест. Лекин ман ҳарӯз мусобиқаҳои ин нобиғаро тамошо мекунаму илҳом мегирам.

- То ба мақоми Чемпионати кушод оид ба ҷиу-ҷитсу расидан, кадом марҳилаҳо пушти сар шуданд?

- То ба ин мақом расидан марҳилаву мушкилиҳои зиёдеро паси сар намудам. Ҳеҷ муваффақият ба осонӣ ба даст намеояд. Ҳамроҳи устодам Қамариддин Ҷалилов хело заҳматҳо кашидем, тамринҳои зиёде кардем.

- Дар Чемпионати кушод оид ба ҷиу-ҷитсу байни ҷавонон бароятон кадом ҳариф пурқувваттар буд?

- Дар мусобиқаи мазкур ҳамаи ҳарифонам пурқувват буданд ва маҳорати баланди варзишӣ доштанд. Ман ҳам аз онҳо камӣ надоштам, чун таҷрибадор будам. Тез – тез ба мусобиқаҳое, ки дар шаҳрҳои гуногуни Ҷумҳурии Мардумии Чин баргузор мегардид, сафарбар мешудам. Бо ҳамаи ҳарифонам шиносоӣ доштам. Ҳарчанд онҳо мехостанд, маро мағлуб созанд, аммо наметавонистанд. Чун ҳар яки онҳоро ба пурраги омӯхта будам. Тарзу усули бозиашонро хуб аз худ карда будам. Шояд ҳамин омӯхтанҳои зиёд буд, ки тавонистам ғолиб гардам.

- То ба ин зинаҳои комёбӣ расиданатон саҳми киҳо бештар аст – мураббиён, аҳли оила ва ё ?..

- Пеш аз ҳама саҳми волидонам бештар аст. Ҳамеша ҳамроҳаманд. Сипос мегӯям барои дар канорам буданашон. Бо ҳарфҳои умедворкунандаашон умедам медиҳанд. Мегӯянд, ҳеҷ гоҳ руҳафтода машав. Ҳамеша ба худат бовар дошта бош. Фикрҳои хубро дар сарат ҷой деҳ. Мусбат биандеш. Ҳамин тариқ бо маслиҳатҳояшон ҳамеша роҳнамояманд. Тӯли ҳафт сол мешавад, ки дур аз ватанам. Дар он ҷо ҳам таҳсили илм менамояму ҳам ба варзиш машғулам. Ҳарчанд аз чашмашон дур ҳам бошам, ҳамеша дар канорам буданашонро эҳсос мекунам.

- Шумо баробари варзишгар будан, инчунин донишҷӯи Донишгоҳи технологии шаҳри Пекин ҳастед. Шароит дар он ҷо чӣ гуна аст?

- Бале, донишҷӯйӣ соли панҷуми Донишгоҳи технологии Пекин мебошам. Ихтисосам меъморист. Шарту шароит дар он ҷо хуб аст. Вақте ки дар ватанамон будам, маро таърих ва фарҳанги Чин ба худ ҷалб кард. Бесаброна интизори таҳсил дар ин кишвар будам. Саъю талошҳоям буд, ки имрӯз ба орзуям расидаму дар ин кишвар донишҷӯ гаштам. Вақте ки бори аввал ба Чин омадам, аз нақлиёт ва технологияи пешрафтаи Чин ба ҳайрат афтодам. Ман дар он ҷо зиндагиямро бо идрорпулӣ мегузаронам. Тамоми хароҷотам аз ҳисоби идрорпулиям мебошад. Ва аз ҳеҷ чиз танқисӣ намекашам.

- Шумо дар Ҷумҳурии Мардумии Чин намуди варзишии ҷиу-ҷитсуро аз худ кардед, дар он ҷо кӣ роҳнамоятон буд?

- Давоми панҷ сол дар Чин ба ин намуди варзиш машғул будам ва ҳастам. Дар яке аз толорҳои варзишии ҷиу-ҷитсу дар Пекин машқ менамоям. Устодам дар ин ҷода Диего Варгас мебошад. Таҳти роҳбарии ӯ дар мусобиқаҳо иштирок менамоям. Мураббиям нафари бениҳоят хоксору заминист. Барои муваффақ шуданам, аз худам дида бештар кӯшиш мекунад. Ӯ ба ман боварӣ мебахшид ва тарзи зиндагиамро дар маҷмуъ тағйир дод.

- Дар мавриди устод чӣ назар доред? Баъзеҳо мегӯянд, ки вақте дар мусобиқаҳо ғолиб биёӣ, тамоми мардум бо туст. Агар бохтӣ, ҳама аз ту рӯй мегардонанд, ба ҷуз устод.

- Касе гуфтааст, дуруст аст. Воқеан чунин аст. Устоди воқеӣ ҳеҷ гоҳ аз шогирдаш рӯй намегардонад. Шогирдаш хоҳ ғолиб шавад, хоҳ мағлуб. Агар ғолиб шавад, баробараш шод мешаваду ашки шодӣ мерезаду дар ҳолати мағлубият баробари шогирдаш ғамгин мегардад. Ва он тавре вонамуд мекунад, ки осмон ба замин начаспидааст. Бо суханҳояш бароят умед мебахшад. Боварат мекунонад, ки ту дар ин мусобиқа ғолиб наомадӣ, ҳатман дар мусобиқаи баъдӣ ғолиб меоӣ. Ин аст, меҳри устоду шогирд.

- Чаро дигар намуди варзишро неву маҳз ҷиу-ҷитсуро интихоб намудед?

- Ростӣ, вақте ки ба Чин рафтам, аз забони варзишгарон доир ба муваффақиятҳои Леандро Ло бисёр шунидам. Баъдан мусобиқаҳояшро пайгирӣ намуда, тамошо кардам. Бисёр писандам омад, бештари вақтамро барои тамошои наворҳои ӯ сарф менамудам. Шояд ҳамин буд, ки маҳз ҷиу-ҷитсуро интихоб кардам.

- Дар нахустин мусобиқа ғолиб омадед. Ин ба шумо чӣ гуна даст дод?

- Дар аввалин мусобиқа ғолиб омадан, ин заҳмати зиёдро талаб мекунад. Аввалин мусобиқаи ман соли 2019 дар Пекин буд. Бисёр ҳам дар як сатҳи олӣ гузашт. Варзишгарони зиёде аз давлатҳои гуногун бо ҳам қувваозмоӣ мекарданд. Дар байни онҳо ман ҳам будам, бисёр ҳаяҷон доштам. Мусобиқа оғоз шуд. Ҳар яке бо ҳарифи худ мубориза мебурд. Навбат ба ман расид. Ҳарифам бразилиягӣ буд. Мо бо ҳам мубориза бурдем, хушбахтона ғолиб омадам. Соҳиби медали тиллои мусобиқа гаштам. Чун ин аввалин мусобиқаам буд, ҳеҷ бовар надоштам, ки дастболо мегардам. Баъд аз ин мусобиқа боварӣ ба худам даҳчанд шуд.

- Омодагиҳо ба мусобиқаҳои баъдӣ чӣ гуна аст?

- Дар ҳоли ҳозир нақша дорам, ки пеш аз хатми донишгоҳ ба ИМА рафта, дар мусобиқаи байналмилалии IBJJF иштирок намояму соҳиби роҳхат ба Бозиҳои осиёии Гуанҷоу гардам. Ин орзуи ҳамешагии ман аст. Умедворам, ки ғолиб меоям.