Аз 23 то 30 апрел дар шаҳри Ашкободи Туркманистон чемпионати Осиё аз рӯи намудҳои муҳорибаҳои омехта баргузор гардид. Дар он варзишгарон аз 17 давлат миёни ҳам рақобат намуданд.

Тавре аз Ашкобод ба “Ҷавонони Тоҷикистон” хабар доданд, Тоҷикистонро дар мусобиқаи мазкур 16 варзишгар муаррифӣ намуданд. Дар қатори дигар варзишгароне, ки ба гирифтани зинаҳои ифтихорӣ мушараф гардидад,  апаю хоҳарон Фотима ва Зуҳро Холоваҳо низ аз ин унвон бенасиб намонданд.  

Фотима аз намуди Кик лайт ва Лайт контакт дар вазни 50 кило баъди ду пирӯзӣ ва Зуҳро аз намуди Лоу Кик ринг баъди чор пирӯзӣ бо ҳарифонаш аз Малайзия, Туркманистон, Қирғизистон, Макао  дар вазни 52 кило медалҳои тиллоро ба гардан овехтанд. Ба хотири Фотима Зуҳро Холоваҳо Парчами Тоҷикистон парафшон ва Суруди миллӣ танинандоз гардид.

Аз ҳисоби даставӣ Тоҷикистон бо касби 10 медали тилло, 2 нуқра ва 3 биринҷӣ баъди Туркманистону Эрон дар зинаи сеюм қарор гирифт.  

Ёдовар мешавем, ки аз намуди кигбоксинг моҳи сентябри соли 2016 Зуҳро Холова дар мусобиқаи Осиё, ки дар давлати Корея миёни калонсолон баргузор гардид, сазовори медали тилло гардида буд, ки ин аввалин медали тиллои бонуи тоҷик аз ин намуд ҳисобида мешавад.

Фотима Зуҳро Холоваҳо варзишро аз намуди таэквандо ИТФ оғоз намуда, дар ин ришта  унвони қаҳрамони Осиё ва  медали нуқраи чемпионати ҷаҳонро ба даст овардаанд. Таи чанд соли охир аст, ки апаю хоҳарон дар баробари таэквандо ИТФ аз намуди Кикбоксинг (К1) низ Тоҷикистонро дар арсаи байналмилалӣ муаррифӣ мекунанд.