Аз 13 то 16 июл дар шаҳри Остонаи Ҷумҳурии Қазоқистон 16-умин чемпионати Осиё оид ба каратэ-до миёни наврасон ва ҷавонон ва 14-умин чемпионати Осиё оид ба карате-до миёни калонсолон баргузор гардид.

Тавре сомонаи Кумитаи миллии олимпӣ хабар медиҳад, дастаи мунтахаби Тоҷикистонро дар ин мусобиқаи бонуфӯз 23 варзишгар муаррифӣ намуданд, ки аз миёни онҳо Ҳоҷиқурбон Маҳмадов дар вазни 55 кило миёни ҷавонон медали нуқраро соҳиб гардид.

Ҳоҷикурбон Маҳмадов бар ҳарифонаш Артём Пак аз Қирғизистон, Каушик Аравинд аз Ҳиндустон ғалаба карда, дар финал аз варзишгари Индонезия Муктӣ Ваҳю шикаст хурда, мақоми дуюмро касб намуд.

Варзишгарони дигари дастаи мунтахаби ҷумҳурӣ аз медалҳо бенасиб монданд.

Дар чемпионати Осиё оид ба каратэ миёни наврасон, ҷавонон ва калонсолон наздики беш аз 600 варзишгар аз давлатҳои Осиё ширкат карданд. Дар ҳисоби даставӣ Эрон бо 20 медали тилло, 12 нуқра, 10 биринҷӣ сазовори ҷои аввал шуд. Мақомҳои дуюму сеюмро Ҷопон (16, 8, 14) ва Қазоқистон (8, 6, 13) ишғол карданд.

Шодихони НАЗАР, "ҶТ"