Баҳодур Усмонов, муштзани ҷавони тоҷик дар 40-умин мусобиқаи байналмилалӣ доир ба бокс - “GeeВee Boxing Tournament-2022”, ки моҳи апрели соли равон бо иштироки беш аз 100 варзишгар аз кишварҳои гуногуни олам дар шаҳри Хелсинкии Финландия доир гашт, дар вазни -63,5кг соҳиби медали тилло гардид.   

Баҳодур муҳорибаро аз чорякфинал оғоз намуда, бар намояндаи Арманистон Ҳамлет Мнатсаканян бо ҳисоби 5:0 пирӯзӣ ба даст овард. Дар нимфинал ҳарифаш аз Маҷористон Ричард Ковачро бо ҳисоби 3:2 шикаст дода, дар финал бар варзишгари шотландӣ Риси Лунч бо ҳисоби 4:1 ғалаба ба даст овард. Дар ин росто бо ӯ суҳбате оростем.

- Биёед, суҳбатамонро аз охирин мусобиқаатон, ки 7-13 апрел дар шаҳри Хелсинки доир гардид, оғоз намоем. Ҷараёни мусобиқа дар кадом сатҳ буд?

- Мусобиқа дар сатҳи олӣ гузашт. Сад варзишгар бо умеди баранда шудан ҷамъ омада буданд. Ҳар яке дар талоши дарёфти медали тилло. Ман ҳам аз ҷумлаи онҳо. Бештар аз он фикр мекардам, ки мабодо шикаст хурам. Мабодо ҳаводоронамро ноумед созам. Аммо аз дарун як ҳиссе бар ман мегуфт, ки ту баранда хоҳӣ шуд! Бояд ба худат бовар дошта бошӣ. Вақте ки ба даври чорякфинал баромадам, худ ба худ ҳисси нобоварӣ аз вуҷудам гум шуд. На тарсе монду на ҳаросе. Билохира баранда шудам.

- Вақте ки медали тиллои мусобиқаи “GeeВee Boxing Tournament-2022” оид ба боксро соҳиб гашта, оро ба шумо тақдим карданд ва ба ин муносибат Суруди миллӣ садо дод, он замон чӣ эҳсос доштед ва бештар ба чӣ ифтихор мекардед?   

- Соли ҷорӣ ин аввалин мусобиқа буд, ки бо дастгирии Кумитаи миллии олимпии кишвар сафарбар шудам. Бештар аз тоҷик буданам ифтихор кардаму аз варзишгар буданам қонеъ гаштам. Бароям боиси ифтихор буд, ки бо шарофати ман Суруди миллӣ садо доду Парчами кишварамон парафшон шуд. Ин як эҳсосотест, ки наметавон бо як - ду ҷумла баён сохт. Воқеан, ин як рӯзи фаромушнашавнда бароям буд.

- Дар ин мусобиқа бароятон кадом ҳариф пурқувват намуд?

- Ман 3 рақиб доштам. Рақиби аввали ман аз Арманистон буд, ки бар ҳисоби 5: 0 мағлуб кадам. Дуюм рақибам аз Маҷористон. Рақиби сеюмам бошад, ҷоизадори Чемпионат ҷаҳон. Ростӣ, барои ман ҳарифи пурқувват дар даври ниҳоӣ, ҷоизадори чемпионати ҷаҳон Риси Лунчи шотландӣ буд.

- Шумо дар финал, дар зинаи асосии мусобиқа бар варзишгари Шотландия Риси Лунч бо ҳисоби 4:1 ғалаба намуда, ғолибият ба даст овардед. Дар бораи Риси Лунч, ки яке аз ҷоизадорони Чемпионати ҷаҳон аст, ягон иттилоъ доштед? Наметарсидед, ки мабодо ӯ ғолиб барояд?

- Не, ҳаргиз наметарсидам. Дар бораи ӯ иттилоъ доштам. Тамоми мусобиқаҳояшро тамошо карда, аз шабакаҳои иҷтимоӣ дар борааш пурра маълумот гирифтам. Хулоса, пеш аз мусобиқа тамоми варзишгарони риштаи боксро меомӯзам. Баъдан ба мусобиқа меравам.

- Мегӯянд, ки вақте дар мусобиқаҳо ғолиб биёӣ, тамоми мардум бо туст. Агар бохтӣ, ҳама аз ту рӯй мегардонанд, ба ҷуз устод. Дар ин маврид чӣ назар доред?

- Ман ба ин андеша розиям. Чунки чунин рӯзҳоро аз сарам гузарондаам, суханҳои бадро низ шунидаам. Дар ин лаҳзаҳои бароят мушкил ягона такягоҳу умедворкунанда модару устодат аст. Устоди ман Мирзо Каримович ҳамеша ва дар ҳама ҳолат бо ман буда, тасаллибахшам мебошад. Мегӯяд, ноумед нашав. Ана ҳамин дастгириҳои пайвастаи устодам буд, ки ман ба ҳамаи ин ноумедиҳо роҳ надода, ба пеш ҳаракат кардам. Бо ҳамроҳии устодам пайваста тамрин мекардам, то муваффақ шавам. Билохира муваффақ ҳам гаштам. Бояд дар роҳи интихобнамуда мубориза бурд. Баҳодурона. Ман низ кӯшиш мекунам ба номам сазовор бошам.

- Лаҳзаи хотирмон бароятон кадом аст? Оё боре аз ин ки варзишро интихоб намудаед, пушаймон шудаед?

- Аз оне, ки варзишро интихоб кардаам, ҳаргиз пушаймон нестам. Чун варзиш шуғли дӯстдоштаи ман аст. Меҳри варзиш дар мағз андар мағзи вуҷудам маъво гирифтааст. Наметавонам аз варзиш ҷудо бошам, он як бахши зиндагии ман шудааст. Хотирмонтарин лаҳзаҳо бароям зиёд аст. Ҳар гоҳе ҳариферо, ки мағлуб кардаю ғолиб меоям, хотирмон аст. Ҳар гоҳе номи ватанам - Тоҷикистон миёни садҳо кишвар садо медиҳад, бароям хотирмон аст.