Рӯзи 2-юми ноябр дастаи мунтахаби наврасони то 17-солаи Тоҷикистон таҳти роҳбарии сармураббӣ Марко Раҷини барои иштирок дар Ҷоми ҷаҳон-2025 озими Қатар шуд.

Дастаи наврасони Тоҷикистон аввалин бозии худро дар марҳилаи гурӯҳӣ рӯзи 5 ноябр дар гурӯҳи "I" бо ҳамтоёни худ аз Чехия, 8-уми ноябр бо мунтахаби Иёлоти Муттаҳидаи Амрико ва 11-уми ноябр бо дастаи Буркина-Фасо бозӣ мекунанд.

Дар ҳамин ҳол сармураббии мунтахаби наврасони Тоҷикистон (U-17) Марко Раҷини, мутахассиси итолиёӣ, ҳайати ниҳоии дастаро барои иштирок дар қаҳрамонии ҷаҳон-2025 эълон кард.

Ба иттилои Федератсияи футболи Тоҷикистон, ба ҳайати дастаи мунтахаби наврасони то 17-солаи кишвар 21 бозигар – 3 дарвозабон, 7 ҳимоятгар, 8 нимҳимоятгар ва 3 ҳамлагар – аз тимҳои наврасони ҷумҳурӣ дохил шуданд.

Қайд кардан зарур аст, ки бар асоси қуръакашӣ 48 даста ба 12 гурӯҳ тақсим шудааст. Аз ҳар як гурӯҳ ду дастаи пешсаф мустақиман ба даври баъдӣ роҳ меёбад, инчунин, дастаи мавқеъи сеюм бо беҳтарин натиҷа аз гурӯҳ боло хоҳад рафт.

Яҳё МАҲМАДНАБИЕВ, “ҶТ”