Дар толори маҷлиси Кумитаи миллии олимпии Тоҷикистон ҷаласаи Маҷлиси умумии Федератсияи гӯштини самбои Тоҷикистон баргузор ва Наҳтуллозода Давлатмурод раиси ин федератсия интихоб шуд.

Дар ҷаласа вакилон аз ҳамаи манотиқи ҷумҳурӣ, ҳамчунин меҳмонон – раиси Кумитаи кор бо ҷавонон ва варзиши назди Ҳукумати ҷумҳурӣ, ҳамзамон муовини Президенти Кумитаи миллии олимпӣ Абдуллозода Аҳтам Рустам, котиби генералии Кумитаи миллии олимпӣ Абдуллозода Муҳаммадшо иштирок карданд.

Иштирокчиёни ҷаласа дар аввал раисикунандаи маҷлис, котиб ва рӯзномаи ҷаласаро ба таври овоздиҳӣ тасдиқ карданд. Аз рӯи масъалаи якуми рӯзномаи ҷаласа аризаи истеъфои раиси федератсия Хайрулло Назриев хонда шуда, бо овоздиҳии вакилон қабул карда шуд.

Дар идома аз рӯи масъалаи дуюм раиси нави Федератсияи самбо интихоб шуд. Ба ин вазифа номзадии як нафар – Наҳтуллозода Давлатумрод, директори генералии КВД “Ташкили фурӯши амволи давлатӣ”-и Кумитаи давлатии сармоягузорӣ ва идораи амволи давлатӣ пешниҳод шуда, интихоб гардид.

Абдуллозода Аҳтам зимни суханронӣ Наҳутллозода Давлатмуродро барои интихоб шуданаш ба вазифаи раиси Федератсия самбо таҳният гуфта, иброз дошт, ки гӯштини самбо дар кишвар рушд кардааст ва имрӯз дар ҷумҳурӣ беш аз 500 нафар дар ин намуди варзиш тамрин мекунанд. Варзишгарони мо дар сатҳи байналмилалӣ дастовардҳои назаррас доранд, аз ҷумла соли гузашта дар чемпионати ҷаҳон тими мунтахаби самбои кишвар сазовори 5 медал гардиданд. Варзишгари маъруф Хоҷазода Беҳрӯз баъд аз 42 соли пирӯзии Саидмуъмин Раҳимов дар ин чемпионат медали тилло ба даст овард.

Қайд гардид, ки гӯштини самбо дар барномаи 18-ум Бозиҳои Осиё, ки моҳи августи имсол дар Индонезия баргузор мешавад, ворид гардидааст ва аз мураббиёни ин намуди варзиш даъват карда шуд, ки ба бозиҳо таҳти роҳбарии раиси нави федератсия ҷиддӣ омода шаванд.

Наҳтуллозода Давлатмурод барои боварӣ ва интихоб шуданаш ба ҳайси раиси Федератсияи самбо ба вакилон изҳори сипос карда, ваъда дод, ки барои рушди бештари гӯштини самбо ҳамаи имкониятҳоро истифода хоҳад кард.