Виктория Киселёва, намояндаи Тоҷикистон дар мусобиқаи “Hong Kong Asian Open -2024” оидба ҷудо, ки мизбониашро Ҳонгконги Чин бар уҳда дошт, сазовори нишони тилло гардид.

Варзишгарбонуи кишвар, ки ҳамагӣ 19 сол дорад, дар даври ниҳоӣ бар варзишгардухтари Кореяи Ҷанубӣ зери вазни ҷамъи 78 кг ғолиб омада, дар таърихи ҷудои кишвар байни бонувон таърихсозӣ кард. Зеро ӯ бо мағлуб кардани ҳамаи рақибон ба гирифтани нишони тилло даст ёфт. Ин нишони тилло дар таърихи ҷудои Тоҷикистон аввалин миёни бонувон дар мусобиқаҳои байналмилалӣ маҳсуб мешавад.

Тоҷикистонро дар мусобиқаи мазкур ду бону - Кан Александра зери вазни то 57 кг ва Виктория Киселёва зери вазни ҷамъи 78 кг муаррифӣ карданд.

Варзишгари дигари кишвари мо Кан Александра зери вазни то 57 кг ноком шуд.

Ёдовар мешавем, ки дар мусобиқаи мазкур 128 ҷудокор (74 мард, 54 зан) аз 13 кишвари ҷаҳон иштирок доштанд.

Яҳё МАҲМАДНАБИЕВ, “ҶТ”