Намояндаи Ҷумҳурии Тоҷикистон Виктор Рассадин дар мусобиқаи байналмилалии силсилаи Гран-при оид ба гӯштии тарзи озод, ки ба хотираи қаҳрамони секаратаи олимпӣ Александр Медвед бахшида шуда буд, бо маҳорати баланд баромад карда, сазовори медали тилло гардид. Ин мусобиқа рӯзҳои 20-22 феврали соли равон дар шаҳри Минск баргузор шуд.

Намояндаи 32-солаи Тоҷикистон рақобатҳоро дар вазни то 70 кг анҷом дода, дар ҳамаи даврҳо бартарӣ нишон дод ва ба марҳилаи ниҳоӣ роҳ ёфт. Дар финал ӯ бар варзишгари 20-солаи Русия Максим Ли ғалаба карда, ба зинаи аввал баромад.

Рассадин то расидан ба шаҳсӯфраи зафар, дар даври аввал намояндаи Русия Ислом Кажаров, дар чорякфинал гӯштигири қазоқ Начин Куулари ва дар ниманиҳоӣ боз як варзишгари Қазоқистон Амирхон Яндиевро мағлуб кард.

Бояд гуфт, ки Виктор Рассадин зодаи Ёқутистон буда, шаҳрвандии Тоҷикистонро пазируфтааст. Ӯ аз моҳи декабри соли 2023 расман ба ҳайати дастаи мунтахаби кишвар шомил шуда, шарафи варзиши тоҷикро ҳамоя мекунад.

Дар соли 2024 Рассадин дар Бозиҳои 33-юми тобистонаи олимпӣ, ки дар шаҳри Порис баргузор гардиданд, дар риштаи гӯштии тарзи озод дар вазни то 74 кг иштирок намуда, дар рақобат барои медали биринҷӣ аз гӯштигири албаниягӣ Чермен Валиев мағлуб шуд.

Ҳамчунин, соли 2024 ӯ дар мусобиқаи қаҳрамонии Осиё оид ба гӯштии тарзи озод, ки дар шаҳри Бишкек доир гардид, дар ҳайати мунтахаби Тоҷикистон медали нуқра ба даст овард. Ин натиҷа соли 2025 низ такрор шуд. Маҳз дар он мавсим Рассадин дар қаҳрамонии Осиё дар шаҳри Уммон дар вазни то 70 кг боз соҳиби медали нуқра гардид.

Илова бар ин, варзишгари тоҷик дар мусобиқаи байналмилалии гӯштии тарзи озод ба хотираи мураббии варзидаи русиягӣ Дмитрий Коркин, ки моҳи ноябри соли гузашта бо иштироки зиёда аз 200 варзишгар аз 11 кишвар дар Ёқутистони Русия баргузор шуд, бо медали тило мукофотонида шуд.

Ин дастовардҳо ҷойгоҳи Виктор Рассадинро ҳамчун яке аз гӯштигирони муваффақи ҳайати мунтахаби Тоҷикистон дар арсаи байналмилалӣ боз ҳам мустаҳкам мекунанд.

Яҳё МАҲМАДНАБИЕВ, “ҶТ”