Дастаи мунтахаби ҷавонони то 23 солаи Тоҷикистон оид ба футбол дар мусобиқаи интихобии қаҳрамонии Осиё-2018, дар гурӯҳи “Е” бозии охиринашро бо тими Урдун баргузор намуда, бо ҳисоби 0:2 шикаст хӯрд ва аз ҳаққи ширкат дар марҳилаи ниҳоӣ маҳрум шуд.

Ин дидор шоми 23-уми июл дар варзишгоҳи «Дура»-и шаҳри Ҳеврони Фаластин доир гардид. Голи нахустини рақобатро дар дақиқаи 55-ум Аҳмад Фавзӣ Маҳмуд ба ҳадаф расонид ва пас аз 13 дақиқа Баха Файсал Муҳаммад голи дуюми дастаашро вориди дарвозаи Беҳруз Хайриев намуд. Футболбозони тоҷик ҳарчанд дар қисми дуюми рақобат барои тағйир додани ҳисоб талош варзиданд, аммо он натиҷае надод.

Бозии дигари гурӯҳи “Е” миёни мунтахабҳои Фаластин ва Бангладеш баргузор гардид. Дар ин дидор тими ҷавонони Фаластин ҳарифро бо ҳисоби 3:0 мағлуб намуданд. Ҳамаи голҳоро Маҳмуд Абуварда дар дақиқаҳои 8, 36,90+1 ба номаш сабт намуд.

Пас аз хотимаи бозиҳои гурӯҳӣ, дастаи мунтахаби Фаластин бо ҳафт хол дар ҷадвал мақоми аввалро касб кард. Тими Урдун бо шаш имтиёз соҳиби ҷойи дуюм гардид. Дастаи ҷавонони Тоҷикистон бо чор хол дар зинаи севум қарор гирифт. Бангладеш бидуни имтиёз дар зинаи охирин ҷойгир шуд.

Аз гурӯҳи “Е” дастаҳои мунтахаби Фаластин ва Урдун роҳхати бозиҳои ниҳоиро ба даст оварданд. Инчунин ба марҳилаи финалии мусобиқаи қаҳрамонии Осиё (U-23), ки аз 9 то 27 январи соли 2018 дар Чин баргузор мегардад, ғолибони нӯҳ гурӯҳ – Умон (гурӯҳи “A”), Ироқ (гурӯҳи “B”), Қатар (гурӯҳи “C”), Узбакистон (гурӯҳи “D”), Фаластин (гурӯҳи “E”), Австралия (гурӯҳи “F”), Кореяи Шимолӣ (гурӯҳи “G”), Малайзия (гурӯҳи “H”) ва Кореяи Ҷанубӣ (гурӯҳи “I”) роҳхат гирифтанд.

Тими мунтахаби ҷавонони Чин дар гурӯҳи “J” ғолиб гардида, шаш дастаи беҳтарин дигар, ки дар гурӯҳҳо ҷойҳои дуюмро ишғол карданд, ба марҳилаи финалии мусобиқа роҳ ёфтанд. Инҳо дастаҳои Арабистони Саудӣ (гурӯҳи “B”), Сурия (гурӯҳи “C”), Урдун (гурӯҳи “E”), Тайланд (гурӯҳи “H”), Ветнам (гурӯҳи “I”) ва Ҷопон (гурӯҳи “J”) мебошанд.

Мусобиқаи қаҳрамонии Осиё-2018 (U-23)
Натиҷаи бозиҳои гурӯҳӣ “Е”

Даври 1-ум 19 июл (чоршанбе)

Урдун – Бангладеш 7-0
Тоҷикистон – Фаластин 2-2

Даври 2-юм 21 июл (ҷумъа)

Бангладеш – Тоҷикистон 1-3
Фаластин – Урдун 3-2

Даври 3-юм 23 июл (якшанбе)

Урдун – Тоҷикистон 2-0
Фаластин – Бангладеш 3-0

Мавқеи дастаҳо дар ҷадвали ҷамъбастии гурӯҳи “Е”

Ҷ ДАСТАҲО Б Ғ М Б Т И
1 Фаластин 3 2 1 0 8-4 7
2 Урдун 3 2 0 1 11-3 6
3 Тоҷикистон 3 1 1 1 5-5 4
4 Бангладеш 3 0 0 3 1-13 0

Шаҳбози АСОМИДДИН, “ҶТ”