Бо иқдоми Раёсати кор бо ҷавонон ва варзиши ВМКБ дар ҳамкорӣ бо Комиссариати ҳарбии вилоят ба ифтихори 26 - солагии Қувваҳои мусаллаҳи Ҷумҳурии Тоҷикистон дар Маркази омодагии олимпии Хоруғ мусобиқаҳои гуногуни вилоятӣ баргузор мегарданд.

Дар ин бора сардори раёсат Сураҷ Чоршанбиев иттилоъ дода гуфт, ки ҳоло дар марказ байни сохторҳои қудратии Комиссариати ҳарбии вилоят, раёсатҳои Вазорати корҳои дохилӣ, Кумитаи давлатии амнияти миллӣ дар ВМКБ, қисмҳои низомии 0410 ва 01123, раёсатҳои гумрук, андоз ва Агентии назорати маводи нашъаовари назди Президенти кишвар, Ташкилоти ҷамъиятии мададгори мудофиа, Хадамоти давлатии оташнишонӣ, Комендатураи ҳарбӣ ва Раёсати ҳолатҳои фавқулода ва мудофиаи гражданӣ сабқати футболи хурд оғоз гашт.

Ба гуфтаи манбаъ сабқат то то рӯзи 23 феврал идома ёфта, ҳамзамон мусобиқаҳои гӯштини миллӣ, футбол, шоҳмот, дастхобонӣ, гурзбардорӣ ва ғайра доир мешаванд.

Ғолибон бо ифтихорнома ва туҳфаҳои хотиравӣ сарафароз мегарданд.