21 июн, дар Маҷмааи ҳавзҳои шиноварии 20 - солагии Истиқлолияти Ҷумҳурии Тоҷикистон дар шаҳри Хуҷанд мусобиқаи байналмилалии шиноварӣ оғоз гардид.

Дар маросими ифтитоҳии чорабинии варзишӣ Раҷаббой Аҳмадзода, раиси вилояти Суғд иштирок ва суханронӣ намуда, аз ҷумла иброз дошт, ки ин намуди мусобиқаи мазкур дар сатҳи байналмилалӣ нахусттин бор дар кишвари мо доир гардида, ба таҳкими солимии ҷомеа ва ба дӯстиву рафоқати байни кишварҳо мусоидат менамояд.

Абдуллозода Муҳаммадшо, котиби генералии Кумитаи миллии олимпии Ҷумҳурии Тоҷикистон қайд намуд, ки ин намуди мусобиқа ба бозиҳои олимпӣ шомил буда, баргузор гардидани он дар кишвари мо воқеаи фараҳбахш маҳсуб меёбад.

Дар ин мусобиқа беш аз 80 нафар варзишгарон аз ҷумҳуриҳои Тоҷикистон, Ўзбекистон, Қирғизистон, Қазоқистон, Роусия, Туркманистон ва Беларус ширкат варзида, байни ҳам аз рўи намудҳои гуногуни шиноварӣ рақобат менамоянд.

Барои шаффоф гузаронидани ин мусобиқа аз 7 кишвар доварони сатҳи байналмилалӣ даъват гардидаанд. Мусобиқаи байналмилалии шиноварӣ аз рӯи 16 навъи қувваозмоӣ муддати 3 рӯз миёни мардону бонувон идома меёбад ва ғолибон бо ҷоизаҳо қадрдонӣ хоҳанд гашт.