Дар нахустин бозиҳои Ҷоми ҷаҳонии футбол-2026 мунтахаби Мексика бар Африқои Ҷанубӣ бо ҳисоби 2:0 ва мунтахаби Кореяи Ҷанубӣ бар Чехия бо ҳисоби 2:1 ғалаба карданд.

Ин аввалин рақобатҳои чемпионате мебошад, ки бори аввал бо иштироки 48 мунтахаб баргузор мешавад.

Бозии ифтитоҳии мусобиқа дар варзишгоҳи “Estadio Azteca”-и Мексика баргузор шуд. Соҳибони майдон дар ҳузури 80 ҳазор мухлис аз дақиқаҳои аввал фаъолона ҳамла карда, назорати бозиро ба даст гирифтанд.

Ҳисобро ҳамлагари мексикоӣ Хулиан Кинонес дар дақиқаи 9 боз кард. Баъдтар Раул Хименес дар дақиқаи 67 голи дуюми мизбононро ба самар расонд ва пирӯзии дастаашро таъмин кард. Мексика бо ин ғалаба аввалин се имтиёзи худро дар мусобиқа ба даст овард.

Дар бозии дигари даври аввал мунтахабҳои Кореяи Ҷанубӣ ва Чехия бо ҳам рақобат карданд. Нимаи аввали бозӣ бо вуҷуди чанд имконияти хуби голзанӣ бидуни гол анҷом ёфт.

Дар қисми дуюм аввал Чехия ба пеш баромад. Капитани даста Ладислав Крейчи дар дақиқаи 59-ум бо зарбаи сар ҳисобро боз кард.

Аммо мунтахаби Кореяи Ҷанубӣ зуд голи ҷавобиро ба самар расонид. Дар дақиқаи 67-ум Ҳван Ин-Бом ҳисобро баробар кард. Баъд аз ҳамлаҳои пайдарпай, О Ҳён-Гю дар дақиқаи 80-ум голи пирӯзиоварро ба самар расонд.

Гуфтан зарур аст, ки Ҷоми ҷаҳонии футбол-2026 бори аввал дар се кишвар-Мексика, Иёлоти Муттаҳидаи Амрико ва Канада баргузор мешавад. Тибқи формати нав, шумораи мунтахабҳо аз 32 ба 48 афзоиш ёфта, теъдоди бозиҳо ба 104 расидааст.
Коршиносон мегӯянд, формати нав метавонад рақобатҳоро шадидтар ва натиҷаҳоро пешгӯинашаванда кунад.

Я. МАҲМАДНАБИЕВ, “ҶТ”