Дар соли 2025 Кумитаи кор бо ҷавонон ва варзиши назди Ҳукумати Ҷумҳурии Тоҷикистон ҷиҳати таъмини оммавияти тарбияи ҷисмонӣ ва варзиш, ташвиқу тарғиби тарзи ҳаёти солим, ҷалби бештари наврасону ҷавонон ба варзиши касбӣ ва фароҳам овардани шароити мусоиди инфрасохторию ташкилӣ барои варзишгарон як қатор тадбирҳои муҳимеро амалӣ намуд.

Дар ин бора имрӯз 5 - феврал Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, зимни нишасти матбуотӣ иттилоъ дод.

Тавре зикр гардид, ин самт ҳамеша зери таваҷҷуҳи хоссаи Асосгузори сулҳу ваҳдати миллӣ - Пешвои миллат муҳтарам Эмомалӣ Раҳмон қарор дошта, рушди соҳаи варзиш яке аз афзалиятҳои сиёсати давлатӣ ба шумор меравад.

Ба ҳолати 1 декабри соли 2025 дар шаҳру ноҳияҳои ҷумҳурӣ, мувофиқи маълумоти оморӣ, ҳамагӣ 11 ҳазору 280 иншооти варзишӣ, новобаста аз шакли моликият, ба қайд гирифта шудааст. Аз ҷумла, дар кишвар 129 варзишгоҳ, 7 ҳазору 966 майдончаи варзишӣ, 2 ҳазору 321 толори варзишӣ, 107 ҳавзи шиноварӣ, 91 маҷмааи варзишӣ ва маркази солимгардонӣ, инчунин, 771 иншооти махсуси варзишӣ аз қабили тир, боулинг, фитнес, билярд, каток, тенниси рӯи миз ва клубҳои ихтиёрӣ фаъолият доранд.

Гуфта шуд, ки танҳо давоми соли 2025 дар шаҳру ноҳияҳои ҷумҳурӣ 174 иншооти нави варзишӣ ба истифода дода шудааст. Аз ин шумора 132 майдончаи варзишӣ, 35 толори варзишӣ, 3 ҳавзи шиноварӣ, 2 маҷмааи варзишӣ ва маркази солимгардонӣ мебошанд. Арзиши умумии иншооти бунёдшуда 174 миллиону 254 ҳазор сомониро ташкил дода, аз ин 96 миллиону 630 ҳазор сомонӣ аз ҳисоби буҷети давлатӣ ва 76 миллиону 808 ҳазор сомонӣ аз ҳисоби соҳибкорон ва сарпарастон маблағгузорӣ шудааст.

Ҳамзамон, дар соли 2025 дар шаҳру ноҳияҳои ҷумҳурӣ дар самти рушди тарбияи ҷисмонӣ ва оммавигардонии варзиш 39 ҳазору 742 чорабинӣ баргузор гардида, дар онҳо 3 миллиону 826 ҳазору 984 нафар иштирок намудаанд. Аз шумораи умумии иштирокчиён 576 ҳазору 459 нафарро бонувон ташкил медиҳанд. Илова бар ин, 2 миллиону 143 ҳазору 461 нафар мухлисон ба чорабиниҳои варзишӣ ҷалб шудаанд.

Тибқи маълумоти муқоисавӣ, шумораи чорабиниҳои варзишӣ дар соли 2025 нисбат ба соли 2024 581 адад зиёд гардидааст. Агар соли 2024 дар кишвар 39 ҳазору 161 чорабинӣ баргузор шуда бошад, пас ин нишондод дар соли 2025 ба 39 ҳазору 742 чорабинӣ расидааст. Аз лиҳози фарогирии аҳолӣ низ афзоиш ба назар расида, шумораи иштирокчиён 26 ҳазору 529 нафар бештар шудааст.

Таъкид гардид, ки Кумитаи кор бо ҷавонон ва варзиш минбаъд низ ҷиҳати рушди инфрасохтори варзишӣ, таҳкими заминаи моддиву техникӣ ва густариши иштироки аҳолӣ, бахусус наврасону ҷавонон ва бонувон, дар тарбияи ҷисмонӣ ва варзиш тадбирҳои заруриро амалӣ хоҳад кард.

Яҳё МАҲМАДНАБИЕВ, “ҶТ”