Бо иштироки омӯзгорону донишҷӯён ва ҷавонони ВМКБ дар Донишгоҳи давлатии Хоруғ (ДДХ) ба номи Моёншо Назаршоев бахшида ба Рӯзи Парчам конфронси илмӣ-амалӣ баргузор гардид.

Ноиби ректори Донишгоҳ Ниёзалӣ Қамбаров зимни баромади хеш ҳозиринро ба муносибати ин ҷашн табрик намуда гуфт, ки Парчами миллӣ гувоҳи барҷастатарини соҳибистиқлолии кишвар, посдори шарафу ори миллатамон маҳсуб меёбад ва ба он бояд аз ҳама ҷиҳат арҷ гузошта шавад.

Таҳмина Саодатқадамова, муовини дигари ректор зимни маърӯзааш иброз намуд, ки “Барои ҳар як шаҳрванди кишвар Парчами миллӣ ҳамчун муқаддасот, тимсоли Ваҳдати милливу ягонагӣ буда, он мардумро ба сӯи созандагиву бунёдкорӣ ҳидоят менамояд. Дар зери ливои миллӣ ҳар як тоҷику тоҷикистонӣ дар иттиҳод ва ҳамбастагӣ аз мавҷудияти давлати соҳибихтиёр ва ҷузъи ҷудонашавандаи ҷомеаи ҷаҳон ифтихор мекунад”.

Ғолиб Ниятбеков, муаллими калони кафедраи фалсафа ва сиёсатшиносии ДДХ дар маърӯзаи худ оид ба “Назари неки Пешвои миллат ба ҷавонони Тоҷикистон” қайд намуд: “Дар пешбурди соҳаҳои мухталифи муосири кишвар мавқеи ҷавонон хело ҳам муҳим мебошад. Чунки ин қишри ҷомеа дорои нерӯи тозаву нав, пешбаранда ҳаст ва метавонад, истифодаи технологияи муосирро дар истеҳсолот таъмин созад. Бинобар ин, Ҳукумати мамлакат нисбати ин табақа таваҷҷӯҳи махсус зоҳир мекунад”.

Дар конфронс ҳамчунин, дар мавзӯҳои “Парчам – рамзи ҳувияти миллӣ”, “Парчами давлатӣ рамзи Истиқлолияту ифтихори миллӣ аст” ва “Аҳамияти рангҳо дар интерпретатсияи рамзҳо” ибрози андеша карда шуд.