6-уми феврал боз як ширкати дигари ватанӣ бо Федератсияи футболи Тоҷикистон (ФФТ) ба муҳлати як сол шартномаи ҳамкорӣ баст.

Ин ширкат ҶДММ Шабакаи нуқтаҳои фурӯши сӯзишвории “Ориё” мебошад, ки 9 сол аст, бо 20 нуқтаи фурӯши маҳсулоти сӯзишворӣ барои нақлиёт дар кишвар фаъолият карда, барои саҳм гузоштан дар рушди футболи тоҷик ин иқдомро гирифтааст.

Дар рӯзи бастани қарордод Абдузоир Исмоилов, ҷонишини директори генералии ҶДММ “Эмом Импорт Экспорт” - Шабакаи нуқтаҳои фурӯши сӯзишвории “Ориё” ба рӯзноманигорон гуфт, ки ширкати онҳо дар баробари маблағгузории бозиҳои футбол, ҳамчунин дар самти пахши навори бозиҳо дар расонаҳои иттилоотӣ кӯмаки худро мерасонад.

-Мо иловатан барои таблиғ ва муаррифии футболбозони кишвар ва ҳайати ФФТ наворҳои махсус омода карда, мусоидат мекунем, ки онҳо дар шабакаҳои иҷтимоӣ ва расонаҳои иттилоотӣ бештар нашр шаванд. Ин имкон медиҳад, ки футболбозон ва футболи ватании моро аввал худи сокинони кишварамон ва баъд тамоми ҷаҳон бишносанд. Албатта оғози ҳар коре осон нест, вале мо умедворем, ки ин иқдом ва ҳамкории ширкати мо бо ФФТ натиҷаҳои назаррас ва хеле хубро дар пай хоҳад дошт,-гуфт А. Исмоилов.

Комрон Ҳусейнов, роҳбари департаменти маркетинг ва робита бо ҷомеаи ФФТ бо хушнудӣ аз он ки эътимоди ширкатҳо ва соҳибкорон рӯз аз рӯз ба ФФТ бештар шуда истодааст, изҳор дошт: “ҳамроҳӣ ва дастгириҳои сарпарастони ФФТ метавонанд, дар рушди бемайлони футболи Тоҷикистон таъсири мусбати ҷиддие бигзоранд”.