Дастаи миллии яккачини Тоҷикистон оид ба футбол дар бозии ниманиҳоии мусобиқаи байналмилалии “Bangabandhu Gold Cup” тими мунтахаби Филиппинро бо ҳисоби 2-0 мағлуб намуда, ба финал баромад.

Дидори мазкур 9-уми октябр дар варзишгоҳи “Кокс-Бозор”-и Ҷумҳурии Бангладеш ҷараён гирифт.

Шогирдони Алишер Тухтаев иҷрокунандаи вазифаи сармураббии тими мунтахаби кишвар дар дақиқаи 31-уми бозӣ голи аввалро вориди дарвозаи ҳариф намуда, бартариро ба даст гирифтанд. Муаллифи гол ҳамлагар Комрон Турсунов дониста шуд.

Қисми дуюм низ ба фоидаи футболбозони тоҷик хотима ёфт. Ҳимоятгар Аҳтам Назаров дар дақиқаи 90+7 голи дуюми Тоҷикистонро ба сомон расонида, ғалабаи дастаашро таъмин кард.

Финали Ҷоми тиллоии Бангабанду санаи 12-уми октябр баргузор гардида, ҳарифи дастаи Тоҷикистон ғолиби ҷуфти Фаластин - Бангладеш хоҳад буд, ки имрӯз муайян мегардад.

Ёдовар мешавем, ки мусобиқаи байналмилалии “Bangabandhu Gold Cup” аз 1 то 12 октябр дар Ҷумҳурии Бангладеш доир мегардад. Дар ин мусобиқа 6 даста дар ду гурӯҳ бозӣ карданд.

Тоҷикистон дар гурӯҳи “А” бар тими миллии Непал 2-0 ғолиб омада, аз дастаи Фаластин бо ҳисоби 0-2 мағлуб гардид. Дар гурӯҳи “А” Фаластин бо 6 хол, Тоҷикистон бо 3 имтиёз ба даври нимфинал баромаданд. Дар гурӯҳи “В”- и мусобиқа дастаи Бангладеш ва Филиппин ба даври дигар роҳ ёфтанд.