Дар қатори дигар намудҳои варзиш, теннис низ яке аз варзишҳои маъмулу машҳур буда, дар ҷаҳон ҳаводорони сершумори худро дорост. Хеле хуб аст, ки ин навъи варзиш солҳои охир дар кишвари мо ҳам рушду равнақ меёбад.

Дар Тоҷикистон пас аз ба даст овардани Истиқлолияти давлатӣ соли 1997 Федератсияи тенниси Тоҷикистон фаъол гардида, то имрӯз ба дастовардҳои зиёд ноил гардидааст. Яке аз дастовардҳо ин аъзои Федератсияи тенниси байналмилалӣ шудан мебошад, ки ҳуқуқи овоздиҳӣ ва баргузории мусобиқоти байналмилалӣ дар дохили ҷумҳуриро дорад.

Федератсияи тенниси Тоҷикистон тӯли чор соли охир зиёда аз 20 мусобиқаи байналмилалӣ баргузор кардааст. Дар ин навъи варзиш айни замон варзишгарон бо хоҳишу завқи худ зери роҳбарии мураббиёни соҳибтаҷриба дар толори кушоду барҳавои Муассисаи давлатии “Мактаби махсуси варзишӣ оид ба теннис” тамринҳои пайдарпайи худро ба роҳ мондаанд.

Тавре Абдурасул Муҳид-динов, сармураббии тими мунтахаби Ҷумҳурии Тоҷикистон оид ба теннис зикр намуд, дар кишвар 20 мураббӣ дар ин риштаи варзиш ба шогирдон сабақ меомӯзанд. Дар ин ришта шумораи варзишгарони касбӣ зиёда аз 300 нафарро ташкил медиҳад, ки аз ин шумора 200 нафараш дар шаҳри Душанбе мебошанд.

“Шарту шароит хуб ба роҳ монда шуда, мо дар толори мутобиқ ба ин намуди варзиш машқу тамрин менамоем. Худи ҳамин сол бо иқдому дастгирии бевоситаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар канори варзишгоҳи тозабунёди обии шаҳри Душанбе як майдони тенниси калони дорои ҳама шароит бунёд гардид. Мо дар ин варзишгоҳ метавонем, баробари тамрину гузаронидани мусобиқаҳои ҷумҳуриявӣ, инчунин мусобиқаҳои байналмилалиро низ дар сатҳи баланд баргузор намоем”,- гуфт Абдурасул Муҳиддинов.

Ҳамзамон ҳамсуҳбати мо мегӯяд, яке аз мусобиқаҳои асосие, ки тӯли 10 соли охир баргузор мешавад, ин “Ҷоми Президенти Тоҷикистон” оид ба теннис маҳсуб меёбад, ки он яке аз пешравиҳои тенниси тоҷик аст.

Бояд гуфт, ки ҳавасмандони ин намуди варзиш аз миёни наврасону ҷавонон зиёд буда, пеш аз ҳама бо хоҳишу ихтиёри худ рӯ ба ин намуди варзиш меоранд. Мураббиён низ мехоҳанд, ҷавонон бештар ба ин варзиш рӯ оваранд ва якҷоя кӯшиш ба харҷ диҳанд, то парчами кишвари азизамон ҳамеша дар мусобиқоти байналмилалӣ парафшон гардад.

-Имсол аз сабаби бемории фарогири СOVID-19 мо натавонистем, дар мусобиқаҳои байналмилалӣ иштирок кунем. Соли 2019 бо дастгирии Кумитаи кор бо ҷавонон ва варзиши назди Ҳукумати Ҷумҳурии Тоҷикистон мо дар сафари худ ба Малайзия дар бозии байналмилалӣ иштирок намуда, соҳиби 7 медал гардидем. Айни ҳол ҳамарӯза дар ду баст тамринҳои худро ба роҳ мондаем ва умед дорем, ки вазъият дар ҷаҳон хуб гардида, соли 2021 дар 12 мусобиқаи байналмилалии нақшавӣ иштирок намоем ва ғолибиятро ба даст орем, - илова намуд, Абдурасул Муҳиддинов.

Таҳкурсии тенниси калон ин тенниси рӯимизӣ ба шумор меравад, ки варзишгарон сараввал корро аз он шурӯъ мекунанд. Вайсиддин Каримов, мураббӣ оид ба тенниси рӯимизии КВД “Қасри теннис” мегӯяд: “Мо сараввал он хоҳишмандоне, ки вориди ин намуди варзиш мегарданд, нозукиҳои тенниси рӯимизиро меомӯзонем. Дар ин ҷо муддати як сол тамрин мекунанд ва пас аз он нафарони болаёқатро ба тенниси калон ҷалб менамоем”.

Аз кӯшишу талошҳои мураббиёну варзишгарон бармеояд, ки тенниси тоҷикро ояндаи дурахшоне дар пеш аст. Мо низ умед бар он мебандем, ки ин намуди варзиш боз ҳам рушд меёбад ва теннисбозони тоҷик ному шарафи Тоҷикистонро дар арсаи байналмилалӣ баланд мебардоранд.

Исфандиёр
АМАКҶОНОВ,
коромӯзи “ҶТ”