Муассисаи давлатии "Маркази дарёфт ва рушди истеъдодҳо" - и назди Раёсати маориф ва илми ВМКБ миёни панҷ дастаи хонандагони соли таваллуди 2003 ва хурдтари мактабҳои таҳсилоти миёнаи умумии шаҳру ноҳияҳои вилоят мусобиқаи шоҳмот баргузор намуд.

Тавре аз муассиса иттилоъ доданд, бозӣ бо ҳадафи таҳкими неруи зеҳнии мактаббачагон рӯи кор омада, баъди рақобатҳои шавқовару диданӣ ғолибон бо ифтихорнома ва медалҳои муассиса сарафроз шуданд.

Аз рӯи натиҷаҳои даври охир ҷойи аввал насиби тими “Шуғнон” шуда, зинаҳои дуюму сеюмро дастаҳои “Хоруғ” ва “Рӯшон" ба даст оварданд.

Мавриди қайд аст, ки солҳои охир шоҳмотбозӣ дар қатори дигар бозиҳои варзишӣ миёни ҳамаи табақаҳои аҳолии вилоят таҳким ёфтааст.