12-уми май дар давлати Қувайт дар қароргоҳи Шурои олимпии Осиё 45-умин Ассамблеяи Генералии Шурои олимпии Осиё бо иштироки намояндагони 45 кишвари Осиё аз он ҷумла Тоҷикистон баргузор гардид.

Дар Ассамблеяи мазкур Тоҷикистонро ноиби ваколатдори Президенти Кумитаи миллии олимпии Тоҷикистон, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон - Гулаҳмадзода Зулфиқор, ноиби Президенти Кумитаи миллии олимпӣ - Дилшод Назаров ва Котиби генералии Кумитаи миллии олимпии Тоҷикистон - Муҳаммадшо Абдуллозода намояндагӣ намуданд.

Ассаблеяи Генералии мазкур аз ҷониби Тимоти Фок, ноиби аввали Президенти Шурои олимпии Осиё ифтитоҳӣ оғоз гардида, Президенти Кумитаи миллии олимпии Қувайт - ҷаноби Фаҳад Ал Сабаҳ ва Президенти Кумитаи байналмилалии олимпӣ - хонуми Кирсти Ковентрӣ низ суханронӣ намуданд.

Ҳамзамон қайд менамоем, ки дар Ассаблеяи Генералӣ ҳисобот ва инчунин гузоришҳо дар бобати масъалаҳои мазкур ироа гардиданд
- Ҳисоботи Кумитаи тадорукоти бозиҳои Осиёии Ҳанжоу-2023;
- Ҳисоботи Кумитаи тадорукоти бозиҳои зимистонаи Осиёии Ҳарбин-2025;
- Гузориши Кумитаи тадорукот оид ба бозиҳои Осиёӣ миёни наврасон дар кишвари Баҳрейн-2025;
- Гузориши Кумитаи тадорукот оид ба бозиҳои Аичи Нагояи Ҷопон-2026;
- Гузориш аз Кумитаи тадорукоти Бозиҳои дохили толорӣ ва ҳунарҳои ҳарбии Осиё дар Риёз-2026;
- Гузориш аз Кумитаи тадорукоти Бозиҳои зимистонаи Осиё Неом-2029.