Дар толори варзишии “Қасри варзиш” мусобиқаи варзишӣ оид ба футбол байни варзишгарони солҳои таваллудашон 2008-2009 бахшида ба 70-солагии Корманди шоистаи тарбияи ҷисмонӣ ва варзиш Муҳитдинов Ином ҷамъбаст шуд.

Мусобиқаи варзишӣ давоми 3 рӯз идома ёфта, дар он зиёда аз 80 нафар варзишгар дар ҳайати 5 даста иштирок намуданд.

Дар ҷамъбасти мусобиқаи варзишӣ Мирзоқосим Каримзода - сардори Раёсати кор бо ҷавонон ва варзиши вилояти Суғд, Фирӯза Нуруллозода - муовини раиси шаҳри Хуҷанд ва як қатор собиқадорони соҳа иштирок ва баромад карданд.

Гуфта шуд, ки ҳадаф аз баргузории мусобиқаи мазкур ҷалби ҷавонон ба варзиш ва тарғибу ташвиқи тарзи ҳаёти солим мебошад.

Сипас, дар вазъияти тантанавӣ бо мақсади қадршиносӣ аз меҳнату заҳматҳои Корманди шоистаи тарбияи ҷисмонӣ ва варзиш Муҳитдинов Ином табрикоти раиси вилояти Суғд Раҷаббой Аҳмадзода ва раиси шаҳр расонида шуд.

Дар фарҷом ғолибони мусобиқа бо диплому медал ва туҳфаҳои хотиравӣ қадр карда шуданд.