15 июл оид ба натиҷаҳои фаъолияти Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар нимсолаи якуми соли 2026 нишасти матбуотӣ доир шуд.

Шабнам Раҳимзода, муовини аввали раиси Кумита зимни нишаст таъкид намуд, ки дар саросари ҷумҳурӣ 11 ҳазору 280 иншооти варзишӣ фаъолият менамояд. Аз ин шумора 129 варзишгоҳ, 7861 майдончаи варзишӣ, 2321 толори варзишӣ, 107 ҳавзи шиноварӣ, 91 маҷмааи варзишӣ ва марказҳои солимгардонӣ ва 771 иншооти махсуси варзишӣ, аз қабили тир, фитнес, боулинг, билярд, каток, тенниси рӯи миз ва дигар марказҳои варзишӣ мавҷуданд.

Тибқи иттилоъ, танҳо дар шаш моҳи соли ҷорӣ дар шаҳру ноҳияҳои ҷумҳурӣ 87 иншооти нави варзишӣ, аз ҷумла 59 майдончаи варзишӣ, 24 толори варзишӣ, 2 маҷмааи варзишӣ ва марказҳои солимгардонӣ ва 2 варзишгоҳ бо маблағи умумии 114 миллиону 619 ҳазору 400 сомонӣ сохта, мавриди истифода қарор гирифтанд. Аз ин маблағ беш аз 61 миллион сомонӣ аз ҳисоби буҷети давлатӣ ва зиёда аз 53 миллион сомонӣ аз ҷониби соҳибкорону сарпарастон таъмин шудааст.

Тавре зимни нишаст иттилоъ дода шуд, дар маҷмуъ дар шашмоҳаи аввали соли 2026 аз ҷониби Кумита, сохторҳои маҳаллӣ ва муассисаҳои варзишӣ 25 ҳазору 166 чорабинии оммавию варзишӣ ташкил ва баргузор гардид. Дар онҳо 1 миллиону 652 ҳазору 350 нафар, аз ҷумла 238 ҳазору 676 нафар занону бонувон иштирок намуда, беш аз 1 миллиону 480 ҳазор мухлису тамошобин фаро гирифта шудаанд. Ин нишондиҳанда нисбат ба ҳамин давраи соли гузашта 549 чорабинӣ ва беш аз 81 ҳазор иштирокчӣ зиёд мебошад.

Дар самти рушди варзиши касбӣ низ дастовардҳои назаррас ба қайд гирифта шудаанд. Тоҷикистон дар шашмоҳаи аввали соли равон мизбони 17 чемпионат ва мусобиқаи байналмилалӣ аз рӯи намудҳои гуногуни варзиш гардида, дар онҳо 1078 варзишгар, аз ҷумла 402 бону аз 28 кишвари ҷаҳон иштирок намуданд. Ҳамзамон, дар дохили мамлакат 5333 мусобиқаи касбӣ бо иштироки 172 ҳазору 420 варзишгар баргузор гардида, аз ҷониби дастгоҳи марказии Кумита низ 87 мусобиқаи ҷумҳуриявӣ бо иштироки 12 ҳазору 528 нафар варзишгар, аз ҷумла 2873 нафар бону ташкил карда шудааст.

Зимни нишаст яке аз муҳимтарин дастовардҳои соҳа натиҷаҳои иштироки варзишгарони тоҷик дар мусобиқаҳои байналмилалӣ арзёбӣ гардид. Дар шаш моҳи соли ҷорӣ 480 нафар аъзои дастаҳои мунтахаби кишвар дар 87 мусобиқаи байналмилалӣ дар хориҷи мамлакат иштирок намуда, ба хазинаи варзишии Тоҷикистон 278 медал, аз ҷумла 76 медали тилло, 88 нуқра ва 114 биринҷӣ ворид намуданд. Ин нишондиҳанда нисбат ба ҳамин давраи соли гузашта 40 медал бештар мебошад.

Масъулини Кумита бо ифтихор зикр карданд, ки дар натиҷаи ин дастовардҳо 278 маротиба Парчами давлатии Ҷумҳурии Тоҷикистон дар арсаҳои байналмилалӣ барафрохта шуда, 76 маротиба Суруди миллӣ ба ифтихори пирӯзии варзишгарони тоҷик садо додааст.

Ба гуфтаи масъулин, натиҷаҳои шашмоҳаи аввали соли 2026 бори дигар собит месозанд, ки соҳаи тарбияи ҷисмонӣ ва варзиш дар Тоҷикистон бо суръати баланд рушд намуда, барои таҳкими тарзи ҳаёти солим, тарбияи насли солим ва муаррифии шоистаи давлат дар арсаи байналмилалӣ заминаҳои мусоид фароҳам овардааст.

Яҳё МАҲМАДНАБИЕВ, “ҶТ”