Шоми дирӯз, 27 сентябр, дар Маҷмааи таърихӣ-фарҳангии "Қалъаи Хуҷанд"-и шаҳри Хуҷанд бахшида ба Рӯзи умумиҷаҳонии туризм чорабинии фарҳангӣ баргузор гардид, ки дар он зиёда аз 4000 нафар иштирок намуданд.

Дар чорабинӣ Зариф Мирдадо, сардори Раёсати ҷавонон, варзиш ва сайёҳии вилояти Суғд, Бурҳонзода Умеда Муродӣ, муовини раиси шаҳри Хуҷанд, Бахтиёр Исматҷонов, мудири Бахши ҷавонон, варзиш ва сайёҳии шаҳри Хуҷанд, намояндагони ширкатҳои сайёҳӣ ва сокинони шаҳр иштирок намуданд.
Зариф Мирдадо, сардори Раёсати ҷавонон, варзиш ва сайёҳии вилояти Суғд ва Умеда Муродӣ, муовини раиси шаҳри Хуҷанд ҳозиринро бо Рӯзи ҷаҳонии туризм шодбош намуда, намояндагони фаъоли ширкатҳои туристиро бо "Сипоснома" қадрдонӣ карданд.

Зимни чорабинӣ дар Маҷмааи таърихӣ-фарҳангии "Қалъаи Хуҷанд" Маркази иттилоотии туристӣ ба истифода дода шуд, ки аз ҷониби Ассотсиатсияи тараққиёти туризми "Зарафшон" бунёд гардидааст.