Чанде пеш дар “Кохи Борбад”-и пойтахт Намоиши маҳсулоти корхонаҳои Ноҳияи автономии Нинсяи Ҷумҳурии Мардумии Чин баргузор шуд. Пеш аз оғози намоишгоҳ як гурӯҳ карнайнавозони тоҷик дар тан хилъати зардӯзӣ чанд оҳанги миллиро навохтанд. Меҳмонони чинӣ пурра ин барномаи мусиқиро сабт намуда, сипас бо навбат хилъати навозандагонро пӯшида, ҳамроҳи онҳо акс гирифтанд. Барои онҳо либос ва мусиқии миллии мо ҷолиб буд. Чунин муносибатро мо дар аксар меҳмонони хориҷӣ мебинем. Яъне, ҳар меҳмоне, ки аз дигар кишварҳо ба Тоҷикистон меояд, мехоҳад, ки як нишонаи фарқкунандаи миллиамонро бубинад. 

Дар аксар шаҳрҳои кишварҳои соҳаи туризмашон пешрафта кӯчаҳои махсуси эҷодкорон ҳаст, ки ҳар рӯз дар онҳо навозандагон дар ҳавои кушод ягон асбоби мусиқӣ менавозанд, сарояндагон суруд мехонанд, рассомон расм мекашанд, кулолгарону заргарон маҳсулоти худро ба фурӯш мегузоранд. Чунин кӯчаҳо дар шаҳрҳои Алмаато, Бишкек ва Тошканд низ ҳастанд. Як гурӯҳ ҷавонони ташаббускори шаҳри Душанбе тасмим гирифтаанд, ки барои дар пойтахти мамлакат таъсис додани чунин як кӯча ба раиси шаҳр Маҳмадсаид Убайдуллоев муроҷиат намоянд. Яке аз чунин ҷавонони фаъол Маина Швартс мегӯяд, ки дар кӯчаи эҷодкорон ҳар шахси эҷодкор имкони оянда нишон додани ҳунару истеъдоди худро дорад. Ин иқдом туристонро ҷалб мекунад, барои беҳтар шудани имиҷи пойтахт мусоидат менамояд ва майдончаи ҷолибе барои эҷодкорӣ ва истироҳат мешавад.

- Таъсис додани чунин як кӯча дар оянда метавонад боиси пайдо шудани ҷойҳои нави корӣ гардад, - мегӯяд Маина Швартс. - Иқдоми мазкур ба шаҳри Душанбе симои ҷалбкунанда ва замонавӣ будан хоҳад бахшид. Дар ин сурат аксар соҳибистеъдодҳое, ки паси парда мондаанд, ба аҳли ҷомеа муаррифӣ хоҳанд шуд.

Ба гуфтаи Маина Швартс, таъсис додани кӯчаи эҷодкорон ба рушди ҳунарҳои мардумӣ, пешрафти эҷодкории муосир ва ба сатҳи нави фарҳанги шаҳрӣ баромадани пойтахти кишварамон мусоидат хоҳад намуд. Дар ин сурат маданияти насли наврас ва ҷавонон низ боло меравад. Зеро муошират ва ҳамнишинӣ бо аҳли эҷод ба ҷаҳонбинию тафаккури ҷавонон таъсири мусбат мерасонад.
Ба гуфтаи директори Гурӯҳи театрии “Нигоҳи нав” Шоҳҷамшед Умарӣ қулайтарин мавзеъ барои кӯчаи эҷодкорон майдони назди театри Опера ва балет аст. Зеро он ҷо хиёбони марказӣ маҳсуб ёфта, ба театр наздик буданаш эҷодкоронро ҷалб месозад. Мардум ба мавзеъҳои дур аз марказ намераванд.

- Мавҷуд будани чунин марказ ба ҷавонон чи гуна самаранок истифода бурдани вақти холиро меомӯзонад, - мегӯяд Шоҳҷамшед Умарӣ.

Директори радиои “Ватан” Субҳон Ҷалилов идеяи таъсиси чунин кӯчаро ҷонибдорӣ намуда, мегӯяд: 
- Ман дар шаҳри Варшава (Полша) шоҳиди он шудам, ки бастакори номие роял менавохт. Мардум дар атрофи ӯ ҷамъ шуда, навозиши ӯро ботамкин гӯш мекарданд. Ҳеҷ кас шавқун намекард. Ҳозирин то поёни роялнавозӣ пароканда нашуданд. Чанд ҷавони волонтёр барои овардану бурдани роял ба он бастакор ихтиёрӣ кӯмак мерасониданд.

Эраҷ ном дӯстдори ҷаҳонгардӣ нақл кард, ки дар шаҳри Ню-Йорк шоҳиди тавассути қадаҳҳо мусиқинавозии марде шудааст. Қадаҳҳо вобаста ба андозаи аз об пур шуданашон садои ҳархела мебароварданд. Бинандагон аз ҳунари навозанда ба ҳайрат омада буданд. Эраҷ ҳам дар танҳоӣ ин амалро машқ карда, боварӣ ҳосил намуд, ки чунин кор имконпазир будааст. 

Бартарии мавҷуд будани кӯчаи эҷодкорон боз дар он аст, ки меҳмонони шаҳр дар муддати кӯтоҳ бо расму оин ва эҷодиёти халқи мо ошно мешаванд. Вақте дар наздикӣ мусиқии зинда садо медиҳад, рассом ба майли хотир зинда расм мекашад, шуъбадабоз ҳунари худро нишон медиҳад, армуғон ва намунаи ҳунарҳои дастии ба фурӯш гузошташуда барои сайёҳ рангу таровати дигар мегирад. Ӯ кӯшиш мекунад, ки ин лаҳзаҳои ҷолибро ба навор бардорад, бо ҳунармандон акс бигирад, тоқию либосҳои миллии моро харидорӣ кунад. 

- Хулоса, таъсиси кӯчаи эҷодкорон сайёҳонро чун оҳанрабо ҷалб мекунад, - мегӯяд Маина Швартс. - Зеро имрӯз технология рушд кардаасту сайёҳи хориҷӣ аксу навори сабткардаашро фавран тавассути интернет ба дӯстонаш мефиристад. Он гоҳ дар як лаҳза садҳо нафар аз набзи фарҳангии пойтахти Тоҷикистон огоҳ хоҳанд шуд.

Гурӯҳи ташаббускор пешниҳод мекунанд, ки хуб мешуд барои ба маҷрои дуруст даромадани ин лоиҳа Кумитаи ҷавонон, варзиш ва сайёҳии назди Ҳукумати ҷумҳурӣ дар ҳамкорӣ бо Вазорати фарҳанги мамлакат барномарезии чорабиниҳои чунин кӯчаро роҳандозӣ намоянд, то ки шахсони тасодуфию дур аз эҷодкорӣ ҷои истеъдодҳои ҳақиқиро танг накунанд. Албатта ҳузури кормандони мақомоти дохилӣ бо мақсади пешгирии ҳодисаҳои номатлуб (дуздӣ, авбошӣ) зарур аст, то нохалафе истироҳати меҳмонону сокинони кишварро халалдор насозад.

С. АМИНИЁН