Ноҳияи Рӯшон яке аз мавзеъҳои зебоманзари ВМКБ барои навъҳои гуногуни сайёҳӣ аз қабили экотуритсӣ, кӯҳнавардӣ, сайёҳии деҳотӣ ва ғайра ба ҳисоб меравад.

Воридшавии сайёҳони ба ноҳияи Рӯшон имсол назар ба солҳои қаблӣ зиёд ба назар мерасад. Бештари сайёҳон аз давлатҳои Недерландия, ШМА, Фаронса, Олмон, Покистону Арабистон ташриф оварда, аз мавзеҳои таърихиву археологии ноҳия дидан мекунанд.

Ба гуфти Малика Хоразмшоева корманди Хадамоти иттилоотии Асотсиатсияи Сайёҳиву Экофарҳангии Помир, сайёҳон аз ҳама беш ба водии Бартанги Рӯшон, ба мавзеҳои туристии Барчидеф, Бачор ва Гизеф ташриф меоваранд.

Айни замон, аксари сайёҳон дар мавзеи Емсии ноҳияи мазкур ба дидорбинии зиёратгоҳи «Мушкилкушоҳ» мераванд, ки дар канори рости дарёи Бартанг назди харсангҳои кӯҳӣ ҷой гирифтааст.

Ҳаракат кардан тариқи хатсайри пиёдагардии Рӯшон - Гизеф , ки давоми се соат тӯл мекашад, барои аксарияти сайёҳон аҳамияти хоса дорад.

Ҳамзамон ба мавзеи Барчидеф сайёҳони хориҷию ватанӣ ба кӯли Сарез баромада, аз тамошои ин «нозанини хуфта» ҳаловат мебаранд.

Маконҳои Бардара ва Ғудараи Бартанг бо табиати нотакрораш аз даврони қадим нафарони ватаниву хориҷиро мафтуни зебогии худ кардаст. Мӯъҷизаи дигари водии мазкур деҳаи Хиҷез мебошад. Дар ин мавзеъ солҳост, ки меваи себ дар як сол ду бор ҳосил медиҳад ва ин ҳолат диқати сайёҳони хориҷиёнро ҷалб месозад.

Бояд тазаккур дод, ки дар маркази нохияи Рӯшон ҳамчунин яке аз дижҳои маъруфӣ бостонӣ, қалъаи Вамар дар канори ҷанубу ғарбии ноҳия ҷой гирифтааст.

Дар давраҳои қадим он аз тарафи ҳокимони маҳаллӣ ҳамчун қароргоҳ истифода мешуд. Баландии деворҳои ин дижи бостонӣ 6 метр ва ғафсии онҳо 7 метрро ташкил медиҳанд, ки ҳанӯз ҳам моҳияти бузургӣ таърихӣ дорад.

Мувофиқи тавзеҳоти Холиса Саидхонова, мудири шуъбаи ҷавонон, варзиш ва сайёҳии ноҳияи Рӯшон, бинобар сабаби корҳои таъмириву азнавбарқарорсозии қалъаи Вомар ташрифи сайёҳон ба ин мавзеъ кам гардидааст.