Дар муассисаи давлатии “Академияи ВАО-и Тоҷикистон” дар ҳамкорӣ бо Кумитаи рушди сайёҳии назди Ҳукумати ҷумҳурӣ, санаи 21 ноябр, семинари омӯзишӣ дар мавзӯи “ВАО - инъикосгари асосии захираҳои сайёҳии Тоҷикистон” барои рӯзноманигорони воситаҳои ахбори омма доир гардид.

Ҳабибулло Амирбекзода, муовини аввали раиси Кумитаи рушди сайёҳӣ, зимни ифтитоҳи семинар иброз дошт, ки таъмини рақобатпазири маҳсулоти сайёҳӣ дар асоси баланд бардоштани сифати хизматрасонӣ, мутобиқгардонӣ ба стандартҳои байналмилалӣ ва таъмини бехатарии сайёҳон яке аз ҳадафҳои стратегии рушди соҳа маҳсуб мешавад.

“Имрӯз самтҳои афзалиятноки ин соҳа барои Тоҷикистон сайёҳии экологӣ, табобатию солимгардонӣ, сайругаштӣ, таърихию фарҳангӣ, кӯҳнавардӣ ва шикор ба шумор меравад”, - гуфт дар идома Ҳабибулло Амирбекзода.

Дар семинар инчунин масъалаҳои ҷорӣ намудани стандартҳои байналмилалӣ ва низоми идоракунии сифат дар соҳаи хизматрасонии сайёҳӣ ва меҳмонӣ, сифати хизматрасонӣ чун нишондиҳандаи асосии рушди соҳаи сайёҳӣ, тадбирҳо оид ба баланд бардоштани сифати хизматрасонӣ дар соҳаи сайёҳӣ ва зарурати истифодаи стандартҳои байналмилалӣ дар хизматрасонии меҳмонхонаҳо дар Тоҷикистон муҳокима карда шуданд.