Дар доираи тантанаҳо бахшида ба Рӯзи ҷавонони Тоҷикистон, 23 май, дар саҳни Театри давлатии академии опера ва балети ба номи С. Айнӣ дар шаҳри Душанбе бо иштироки беш аз 6000 нафар ҳамоиш ва роҳпаймоии ҷавонон таҳти унвони “Ҷавонон - пайрави Пешвои миллат” баргузор шуд. 

Қабл аз шуруи ҳамоиш бо иштироки аркестрони ҷавон, аъзоёни Маҳфили “Пайравони Пешвои миллат”, гирандагони Стипендияи президентӣ, гирандагони Стипендияи раиси шаҳри Душанбе, варзишгарон, донишҷӯёни муассисаҳои олии касбӣ, ҷавонони фаъоли шаҳри Душанбе, табибони ҷавон, сарбозону афсарон, гурӯҳи духтарон бо либосҳои миллӣ, мутахассисони ҷавон, донишҷӯёни хориҷие, ки дар Тоҷикистон таҳсил мекунанд, кормандони ҷавони ташкилотҳои қарзӣ ва сохтмончиёни ҷавон роҳпаймоӣ доир гардид.

Дар шуруи ҳамоиш табрикоти Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон аз ҷониби намояндаи Дастгоҳи иҷроияи Президенти Ҷумҳурии Тоҷикистон Азизода Шуҳрат ба ҷавонон қироат шуд.

Мавсума Муинӣ, муовини раиси шаҳри Душанбе аз номи раиси шаҳри Душанбе Рустами Эмомалӣ ҷавононро ба муносибати Рӯзи ҷавонон табрик намуда, иброз дошт: “Шумо ҷавонони ватандӯсту ватанпарвар, матину қавиирода ва далеру шуҷоъ дар ҳама соҳаҳои ҳаёти ҷомеа ғайратмандона фаъолият намуда, дар пешрафти мамлакат ҳиссаи муносиб мегузоред. Барои ободию пешрафти Ватани маҳбубамон софдилона хизмат карда, марзу буми сарзамини аҷдодӣ ва амнияту оромии давлатро содиқона ҳифз месозед. Ва бо донишҳои муосири худ ҳамчун мутахассисони оянда ба хотири тараққиёти кишварамон саҳми назаррас мегузоред. Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон ба неруи тавонои шумо созандагони ҷомеаи навини кишвар эътимоди калон доранд”.

Сипас, барои қироати муроҷиатномаи ҷавонони Тоҷикистон ба Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон ба саҳна раиси Кумитаи кор бо ҷавонон ва варзиши назди Ҳукумати кишвар Аҳтам Абдуллозода даъват карда шуд. Раиси кумита қабл аз қироати муроҷиатнома миннатдории худ ва тамоми ҷавонони кишварро ба Пешвои миллат муҳтарам Эмомалӣ Раҳмон барои заҳматҳои хастанопазир ва дастгирии ҳамешагиашон аз ҷавонон, инчунин ба президенти Федератсияи футболи Тоҷикистон Рустами Эмомалӣ барои сарпарастии чорабиниҳои вобаста ба ҷавонон изҳор намуд.  

Дар қисмати фарҳангии ҳамоиш сарояндагон дар васфи ватану ҷавонӣ сурудҳо сароиданд.

Ёдовар мешавем, ки дар заминаи сиёсати ҷавонпарваронаи Асосгузори сулҳу ваҳдати миллӣ - Пешвои миллат муҳтарам Эмомалӣ Раҳмон аз соли 1998 инҷониб ҳар сол 23 май ҳамчун Рӯзи ҷавонони Тоҷикистон ҷашн гирифта мешавад.