Яке аз дастовардҳои муҳими Истиқлоли давлатӣ барои ҷавонон ин аст, ки онҳо метавонанд ба дилхоҳ давлатҳои хориҷа рафта, кору фаъолият ва таҳсили илм намоянд. Ҷавонони мо дар куҷое набошанд, зери ғамхориҳои Пешвои миллат муҳтарам Эмомалӣ Раҳмон қарор доранд.

Бахтиёр Қосимов, аз зумраи ҷавононест, ки айни замон аспиранти Донишгоҳи давлатии Урали Ҷанубӣ дар Челябински Русия буда, барои корхонаи қубурсозии шаҳри Челябинск муҳаррике ихтироъ намуд, ки он ба ин корхона даромади хубе хоҳад овард.

Бахтиёр имрӯз вирди забони мардуми Челябинск ва қаҳрамони корхонаи “Муҳаррики барқии Русия” аст. Ӯ зодаи Тоҷикистон буда, аз аввал ба фанҳои дақиқ бештар аҳамият медод. Баъди хатми мактаб ӯ тасмим гирифт, ки берун аз кишвар таҳсили худро идома диҳад. Хушбахтона, ӯ донишҷӯи Донишгоҳи давлатии Урали Ҷанубӣ дар Челябински Русия шуд. Имрӯз ӯ олими соҳаи худ аст ва дар арафаи хатми зинаи магис-тратура қарор дорад.

Ин олими тоҷик вобаста ба ихтирооти намудааш гуфт: “Муҳаррики ҷадид бо дархости Корхонаи қубурсозии шаҳри Челябинск сохта шудааст. Ва қариб чор сол пеш ин корхона ба Донишгоҳи давлатии Урали Ҷанубӣ дархост фиристод, ки барояш як муҳаррики ҷадид созанд. Муҳаррике, ки корхона барои истеҳсоли қубурҳои бепайванд истифода мебарад, на фақат куҳнаю фарсуда шудааст, балки мушкил ва зиёни зиёдеро ба бор меорад. Яъне онҳо ба муҳаррики наву замонавӣ муҳтоҷ буда, барои коста нашудани корхонаи хеш, бисёр талош мекарданд”.

Ба гуфти Бахтиёр ин корхона барои пайдо намудани муҳаррики нав мушкилӣ дошт ва ҳатто корхона аввал ба мутахассисони Олмон муроҷиат намуд. Аммо мутахассисони Олмон барои сохтани муҳаррики мазкур маблағе талаб кардаанд, ки хеле зиёд ва пардохташ дар тавони корхона набудааст. Рӯз то рӯз корхона дар ҳолати харобшавӣ қарор дошт ва масъулони он тасмим гирифтанд, ба Донишгоҳи давлатии Урали Ҷанубӣ (ДДУҶ) муроҷиат намоянд. Аз ин донишгоҳ Бахтиёрро равон мекунанд ва ӯ корхонаи мазкурро наҷот медиҳад.
Номбурда илова намуд: “Ба ихтироъкорӣ шавқ доштам ва ба худам ваъда додам, ки бояд чизеро ихтироъ кунам. Дар донишгоҳ аз фаҳмиши баланди ман огоҳ буданд ва ин корро донишгоҳ ба ман супурд. Қариб чор сол бо ёрии ҳамкоронам як муҳаррики пилгериро сохта ба истифода додем, ки мавриди қабули корхона шуд. Ва айни ҳол ихтирои мо дар корхонаи муҳарриксозии “Муҳаррики барқии Русия” – и шаҳри Челябинск қарор дорад ва аз он истифода мебаранд”.

Муҳаррике, ки аз ҷониби ихтироъкори тоҷик сохта шуд, харҷи истеҳсолотро бамаротиб коҳиш медиҳад. Барои мисол фақат аз насбу васли статор ва ротори муҳаррики пилгерӣ корхона ҳудуди ду миллион рубли русиро масраф мекунад. Ба мисли ин муҳаррик то имрӯз дар ҷаҳон пайдо ва истифода нашудааст.

Баъди истифода ва дар муқоиса бо муҳаррикҳои мавҷуд дар корхона маълум гардид, ки ин муҳаррик ғалтаки ангезишӣ надорад, аз ин хотир, хароҷоташ кам аст. Зарби кори фоиданокии муҳаррик баланд буда, барои насби он асбобу таҷҳизоти гаронбаҳо лозим нест. Масалан, ба ҷои ғалтаки ангезишӣ, ки ҳар се моҳ пас бояд таҷдид шавад, дар он бошад, магнити доимӣ мондем, ки ба зудӣ хароб намешавад.

Гуфта мешавад, ки ин муҳаррики ҷадид барои истеҳсоли қубурҳои бепайванд, ки дар дастгоҳҳои пилгерӣ истеҳсол ва дар соҳаи нафту газ истифода мешавад, пешбинӣ шудааст. Баъди муаррифии ин муҳаррик дигар олимон ба кори ӯ баҳои баланд дода, аҳсану офаринаш хонданд ва ҳамагон ӯро ҳамчун донишманди тоҷик муаррифӣ намуданд. Боиси ифтихор аст, ки ҷавонони кишвари мо номи Тоҷикистонро берун аз Ватан баланд мебардоранд.

“Ҷавонӣ айёмест тезгузар. Онро самаранок бояд истифода бурд. Аз рӯйи нақша кор кардан лозим, то ба комёбиҳои ҷодаат ноил гардӣ. Имрӯз дур аз Ватанам, аммо омодаам, ки тамоми кӯшишу маҳорати худро баҳри ободии Ватани азизамон - Тоҷикистон равона карда, дар пешрафти он каме ҳам бошад, саҳмгузор бошам”, - гуфт дар охири суҳбат Бахтиёр.