Имрӯз дар толори Академияи идоракунии давлатии назди Президенти ҶумҳурииТоҷикистон бо ташаббуси Кумитаи иҷроияи Ҳизби Халқии Демократии Тоҷикистон дар шаҳри Душанбе бахшида ба 30 солагии Ҳизби Халқии Демократии Тоҷикистон конференсияи илмӣ – амалӣ таҳти унвони “Ҷавонон дар масири истиқлолият” баргузор гардид.

Зимни баргузории конфронс гуфта шуд, ки истиқлолият ба ҷавонон имкониятҳои васеъ барои омӯзиши забонҳои хориҷӣ, ташаккули шахсияти комил ва озодии афкорро дод.

Ҳамчунин зикр гардид, ки Истиқлолият шароит фароҳам сохт, то ҷавонон эҳёгари фарҳанги миллии хеш бошанду имрӯз хушбахтона ҷавонони тамоми гӯшаю канори ҷумҳурӣ аз як гиребон сар бароварда, сарбаландона меҳнат мекунанд, дониш меомӯзанд ва бинои ояндаи дурахшони худро бунёд месозанд.

Дар идомаи кори конфронс маърузачиён вобаста ба нақши Президенти Ҷумҳурии Тоҷикистон дар ташаккули сиёсати давлатии ҷавонон, дастоварду имкониятҳои муҳайёнамудаи замони соҳибистиқлолӣ барои рушд ва пешрафти кору таҳсили ҷавонон, саҳми ҷавонон дар пойдории истиқлоли давлатӣ ва дигар мавзуъҳои муҳими рӯз суханронӣ намуданд.

Таъкид гардид, ки ҳадаф аз баргузории конфронси мазкур муаррифи имкониятҳои нав барои ҷавонон, дастовардҳои ҷавонон дар замони соҳибистиқлолӣ ва пешрафту тараққиёти кишвари азизамон дар 33 соли истиқлоли давлатӣ мебошад.

Гулафшон КАРИМОВА, ҶТ