Табрикоти раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Аҳтам Абдуллозода ба муносибати Рӯзи ҷавонони Тоҷикистон

Ҷавонони саодатманди кишвар, пайравони Пешвои миллат, дӯстони ҷавонам!

Сараввал ҳамаи Шумо – ояндагони Ватани маҳбубамонро ба муносибати Рӯзи ҷавонони Тоҷикистон табрику таҳният мегӯям.

Дар воқеъ, барои мо - ҷавонон мояи ифтихор аст, ки имрӯзҳо зери сиёсати ҷавонпарваронаи Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон дар Ватани азизу маҳбубамон тамоми шароитҳо муҳайёст. Ҳамасола дар сатҳи баланди ҷамъиятиву сиёсӣ таҷлил гардидани Рӯзи ҷавонон шаҳодати ғамхориҳои пайвастаи Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон ва давлату Ҳукумат нисбат ба насли ҷавони кишвар мебошад.

Маҳз боварию эътимод ва сиёсати ҷавонпарваронаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон буд, ки соли 2017-ро пурра ба ҷавонон бахшида, ин солро “Соли ҷавонон” эълон карданд. Ин барои ҷавонон мояи ифтихору сарфарозист.

Барои дастгирии ҷавонони соҳибистеъдод таъсиси стипендияҳои Президентӣ ва номӣ, квотаи Президентӣ, стипендияи байналмилалии Президентии “Дурахшандагон”, қабули қонуну барномаҳои рушди иҷтимоии ҷавонони мамлакат, грантҳои Ҳукумати Ҷумҳурии Тоҷикистон дар самти тарбияи ватанпарастии ҷавонон, Ҷоизаи ба номи Исмоили Сомонӣ барои олимони ҷавон, таъмини оилаҳои ҷавон бо манзил ва қитъаи замин, Ҷоизаи Президенти Тоҷикистон барои варзишгарони мамлакат, Таъсиси Шӯрои миллии кор бо ҷавонон дар назди Президенти Ҷумҳурии Тоҷикистон ин ҳама дастгириҳо шаҳодати ғамхориҳои пайвастаи давлату Ҳукумат нисбат ба насли ҷавони кишвар мебошад.

Баъди ин қадар дастгириҳою ғамхориҳо Асосгузори сулҳу ваҳдати миллӣ - Пешвои муаззами миллат дар Паёми хеш ба Маҷлиси Олии Ҷумҳурии Тоҷикистон таъкид намуданд, ки ғамхории Ҳукумат нисбат ба ҷавонон танҳо бо “Соли ҷавонон” маҳдуд намешавад. Баръакс, ҳалли масъалаҳои вобаста ба наврасону ҷавонон минбаъд низ самти муҳимтарини фаъолияти мо хоҳад буд. Ин сухани Пешвои муаззами миллат бори дигар собит сохт, ки Ҳукумати кишвар аз мову шумо – насли ояндасози кишвар умеди калон доранд. Ман бовар дорам, ки шумо - ҷавонони кишвар аз уҳдаи иҷрои ҳама вазифаҳои дар наздатон гузошташуда сарбаландона мебароед ва минбаъд низ мекӯшед, ки ба нафъи давлату ҷомеа боз ҳам содиқона хизмат намоед. Зеро шумо-ҷавонон мояи ифтихор ва сарбаландии миллат маҳсуб меёбед. Маҳз шумо қудрат доред чун пешбарандаи илму фарҳанги миллати хеш ва посдорони мероси аҷдодӣ ба наслҳои оянда хизмати арзанда намоед. Шумо борҳо собит намудаед, ки дар ҳақиқат пайравони асили Пешвои муаззами миллат ҳастед ва инро минбаъд низ дар иҷрои ҳама кору масъулият, новобаста аз душвориҳои шароити ҷаҳонишавӣ ва таъсири дигар омилҳои беруна собит кардан лозим аст.

Ҳоло мо дар шароити басо мураккаби ҷаҳонишавӣ зист дорем. Қувваҳои бадхоҳ бо ҳар роҳу восита мехоҳанд ба ваҳдату ягонагии миллати тоҷик, рахна ворид созанд. Аз ҷумла, саъй доранд бархе аз ҷавонони ноогоҳро ба гурӯҳу равияҳои тундрав ҷалб созанд. Баҳри ба мақсад ноил шудан аз ҳеҷ амал рӯ наметобанд. Ҷавонони саодатманди имрӯзаи тоҷик аз он фоҷиаи нангин хеле хуб бохабаранд. Ин сабақ барои ҳар як тоҷики ватанхоҳу миллатдӯст хоҳад буд. Умед аст, ҷавонони мо дигар ҳаргиз фирефтаи ниятҳои нопоки бадхоҳони миллат нахоҳанд шуд.

Ман ба қудрати дӯстони ҷавонам итминони комил дорам. Ман бовар дорам, ки ҳар яки шумо, пеш аз ҳама, омӯхтани илму дониш, касбу ҳунар ва меҳнати самарабахшро вазифаи ҷонии худ дониста, дар оянда мавқеи сазовори худро дар ҷомеа пайдо мекунед ва дар таҳкими ваҳдати миллӣ, истиқлолияти давлатӣ ва рушду ободии Ватани азизамон саҳми арзанда мегузоред.

Рӯзи ҷавонони Тоҷикистон муборак!