Давоми солҳои соҳибистиқлолӣ таҳти сиёсати хирадмандонаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон мақому мавқеи ҷавонон дар ҷомеа ба маротиб баланд гардида, ҷалби бештари онҳо ба корҳои ҷамъиятиву идоракунӣ саҳми ин қишри фаъоли ҷамъиятро дар пешрафту ободии мамлакат бештар намуд. Ҳамин аст, ки имрӯз чи дар сатҳи вазорату идораҳои давлатӣ ва чи дар корҳои муҳими ҷамъиятӣ ҷавонон нақши пашбарро доранд ва дар пешрафти соҳаҳои мухталифи хоҷагии халқи мамлакат саҳми арзанда мегузоранд. Пешво миллат мӯҳтарам Эмомалӣ Раҳмон дар Паёми худ ба Маҷлиси Олии Ҷумҳурии Тоҷикистон аз 22 декабри соли 2016 гуфта буданд, ки “аксарияти аҳолии Тоҷикистонро ҷавонон ташкил медиҳанд, ки онҳо давомдиҳандаи кору фаъолияти насли калонсол, нерӯи созанда ва иқтидори воқеии пешрафти ҷомеа, хулоса, ояндаи миллат ва давлат мебошанд”. Маҳз таваҷҷӯҳу ғамхориҳои пайвастаи роҳбарияти олии мамлакат ба ҷавонон аст, ки дар замони соҳибистиқлолӣ нақши ин қишри фаъоли ҷамъият зина ба зина боло рафта, ҳамасола дар асоси Қонуни Ҷумҳурии Тоҷикистон “Дар бораи рӯзҳои ид” 23-уми май ҳамчун Рӯзи ҷавонони Тоҷикистон ҷашн гирифта мешавад. Илова бар ин бо ибтикори бевоситаи Пешвоми миллат мӯҳтарам Эмомалӣ Раҳмон соли 2017 “Соли ҷавонон” эълон гардида буд, ки ин ҳам аз таваҷҷӯҳи беандозаи Роҳбари давлат ба ҷавонон гувоҳӣ медиҳад.

Дар заминаи ҳамин ғамхориву дастгириҳои пайвастаи давлату ҳукумати Тоҷикистон солҳои охир дар доираи Рӯзи ҷавонони кишвар силсилаи чорабиниву маросимҳои гуногуни фарҳангиву варзишӣ ва маърифатӣ доир мегарданд. Имсол низ ҳамин гуна чорабиниҳо дар саросари кишвар, аз ҷумла дар ноҳияи Мастчоҳ доир гардиданд, ки доираи васеи ҷавонон ба онҳо ҷалб гардида буданд. Дар қатори силсилаи чорабиниҳо, ки бахшида ба ин сана доир шуданд, масъулони МТМУ-и рақами 14-и ноҳияи Мастчоҳ бо баргузории як чорабинии хотирмони фарҳангиву маърифатӣ Рӯзи ҷавононро таҷлил намуданд. Дар ин чорабинӣ нахуст намоиши ҳунарҳои дастии хонандагони муассиса, ки дар ҷараёни дарсҳои таълими меҳнат, аз қабили кандакорӣ дар чуб, асбобҳои рӯзгор, кашидадӯзӣ, тоқиҳои рангоранги гулдузишуда, ҳунари бофандагии хонандагон ба маърази тамошо гузошта шуданд. Бо баргузории шартҳои гуногун аъзои ҳакамон, ки аз ҳисоби омӯзгорони ботаҷрибаи муассиса таъсис ёфта буд, ҳунари кадбонугии ҷавондухтарони муассисаро дар самти таёр намуани таомҳои миллӣ ва хуришҳои гуногун санҷида, ба ҳунари онҳо баҳои баланд доданд. Дар қисмати фарҳангии чорабинӣ хонандагони сину соли гуногун бо қироати шеъру дубайтиҳо ва сурудҳо дар васфи ишқу ҷавонӣ табъи иштирокчиёни чорабиниро болида гардониданд. Башорат Мирзобекова, омӯзгори ботаҷрибаи муассиса, ки фаъолияташро дар ин даргоҳи илм аз соли 1987 шурӯъ намудаву бо наслҳои гуногуни ин даргоҳро хатмкарда кор кардааст, дар ин чорабинӣ суханронӣ намуда, ҷавононро ба Рӯзи идашон табрик гуфтанд ва ба онҳо барои фаъолияти минбаъдаашон барору комёбиҳо орзӯ намуданд. Муаллима бо хоксории ба худашон хос аз ҳамаи ҷавонон самимона даъват ба амал оварданд, ки дар ҳар кору касбе, ки набошанд баҳри халқу диёри худ аз сидқ хизмат намоянд ва баҳри ободии Ватан, ки такягоҳи аслии онҳост, ҳамаҷониба талош варзанд.

Ҳамчунин дар ин замина миёни хонандагон як қатор бозиҳои варзишӣ ташкил ва гузаронида шуд, ки дар он ҷавонписарону ҷавондухтарон аз худ чусту чолокӣ нишон дода, исбот карданд, ки барои хизмат ба ватан дар ҳама бахшҳо омодаанд.

Зимни баргузории ин чорабиниҳо ман дар симои ҷавондухтарону ҷавонписарони МТМУ-и рақами 14-и ноҳияи Мастчоҳ ҳисси ватандӯстиву эҳтиром ба муқаддасоти миллиро дарк кардам. Бори дигар итминон ҳосил намудам, ки имрӯз Тоҷикистони азиз дар симои ҷавонони далеру шуҷои худ фарзандонеро дорад, ки баҳри пешрафту саодати он ба ҳама чи таёранд ва дар пастиву баландии зиндагӣ аз худ ҷасорат нишон дода метавонанд. Дар воқеъ имрӯз давлату ҳукумат ҳама чизро барои рушду пешрафти ҷавонон муҳай кардааст, ки ин ғамхориҳо ҷавононро рӯҳбаланд намуда, барои кӯшишу ғайрати онҳо, ҷиҳати хизмат ба Ватан-Модар мусоидат мекунад.

 Замонова Таҳмина,
омӯзгори забон ва адабиёти тоҷики
МТМУ №14-и ноҳияи Мастчоҳ