21 майи соли равон бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар доираи моҳвораи ҷавонон бахшида ба 23 – май Рӯзи ҷавонони Тоҷикистон дар Осорхонаи миллии Тоҷикистон ҳамоиши ғолибони озмуни ҷумҳуриявии “Тоҷикистон – Ватани азизи ман”, “Фурӯғи субҳи доноӣ китоб аст” ва “Илм – фурӯғи маърифат” баргузор гардид.

Дар ҳамоиши мазкур Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Давлат Сафар, муовини вазири фарҳанг, намояндагони вазорату идораҳо, донишҷӯёни донишгоҳу донишкадаҳо ва ғолибони озмунҳои ҷумҳуриявӣ, инчунин гирандагони Стипендияи президентӣ иштироку суханронӣ намуданд.

Нахуст Абдулло Раҳмонзода, раиси КҶВ баромад намуда, иштирокчиёни ҳамоиши мазкурро бахшида ба Рӯзи ҷавонон табрик намуд.

Мавсуф иброз дошт, ки ин якумин ҳамоиш бо иштироки ғолибони озмунҳои ҷумҳуриявӣ дар сатҳи кишвар мебошад.

Ҳамчунин ӯ афзуд: “Дар ҳақиқат ин озмунҳо тавонистанд, ки соҳибистеъдоду донишмандони навро кашф ва илми тоҷикро дар арсаи байналмилаллӣ муаррифӣ намоянд. Бо раҳандозӣ гардидани озмунҳои гуногун завқи китобхониву ихтироъкорӣ, инчунин сурурду мусиқӣ дар замири ҷавонон зиёд гардид. Дар ҳақиқат ин ҳама иқдому дастгириҳои бевоситаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳам дар Тоҷикистон ва ҳам дар сатҳи ҷаҳонӣ назир надорад”.

Дар идома Давлат Сафар, муовини вазири фарҳанги Ҷумҳурии Тоҷикистон баромад намуда, нақши озмунҳои ҷумҳуриявиро дар тарбияи маънавию ватандӯстии ҷавонон баланд арзёбӣ намуд.

- Озмунҳое, ки бо иқдомҳои созандаи Пешвои миллат ба роҳ монда шудаанд барои бедор намудани тафаккури миллӣ хизмат мекунанд. Мо маҳз ба воситаи ин озмунҳо метавонем, ки як ҷомеаи ибратомӯзи шаҳрвандиро бисозем. Зеро яке аз рукнҳои асосии бунёди ҷомеаи шаҳрвандӣ илму маърифат ва фарҳангу маънавиёт мебошад. Мо ба мисли ин озмунҳо бояд доимо рақобатҳои солим дошта бошем, зеро дар сурати рақобатҳои солим ва доимӣ метавон умед ба ояндаи дурахшон намуд. Он истеъдоду донишмандоне, ки тайи чанд соли ахир тариқи ин озмунҳо кашф мегарданд қадами неки моро ба оянда таъмин мекунанд. Дар умум озмунҳои зикргардида тавонистанд барои ояндаи миллат саҳми беназир гузоранд”.

Баъди суханронии намояндагони вазорату идораҳо ғолибони озмуни ҷумҳуриявии “Тоҷикистон – Ватани азизи ман”, “Фурӯғи субҳи доноӣ китоб аст” ва “Илм – фурӯғи маърифат” маърузаҳои худро ироа намуданд.

Аз ҷумла, Шаҳло Сайдалиева, барандаи Шоҳҷоизаи озмуни ҷумҳуриявии “Фурӯғи субҳи доноӣ китоб аст” баромад намуда, баргузории чунин озмунҳоро аз сиёсати хирадманодонаву инсонпарваронаи Президенти мамалакат муҳтарам Эмомалӣ Раҳмон унвон намуд.

Инчунин дар идомаи баромади худ афзуд, ки: “Маҳз бо талошҳои пайвастаи Пешвои миллат сол то сол мақому ҷойгоҳи ҷавонон ба маротиб баланд гардида истодааст. Воқеан ҷавонон дар ҳама давру замон нерӯи бузургу бунёдгари созандаи давлату мамлакат буданд, ҳастанд ва мебошанд. Ҳанӯз ҳазор сол муқаддам Арасту гуфта буд, ки “ҳама касоне, ки дар хусуси санъати идоракунии тафаккур намудаанд, бояд аз хотир фаромуш насозанд, ки тақдири империя ба тарбияи ҷавонон вобастагӣ дорад.” Пешвои муаззами миллат низ дар ҳар як суханрониҳояшон таъкид месозанд, ки ҷавонон бояд сабақҳои истиқлолиятро ҳаматарафа омӯзанд, аз сиёсати имрӯза огоҳ бошанду таърихи гузаштаву имрӯзи худро донанд ва аз гузаштаи худ ифтихор намоянд”.

Дар идомаи чорабинӣ ғолибони озмунҳои аз дастгириҳои пайвастаи давлату Ҳукумати кишвар нисбати ҷавонон изҳори қаноатмандӣ намуданд ва баргузории ин озмунҳоро намунаи олии дастгирии Ҳукумати кишвар унвон доданд.

Баъди ироаи маърӯзаҳо изҳороти иштирокчиёни ҳамоиши мазкур шунида шуд ва дар охир ба иштирокчиёни фаъол, ҳамчунин ғолибони озмунҳо бахшида ба Рӯзи ҷавонон аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон сипосномаҳо тақдим гардид.

Идомаи ҳамоиш, нимаи дуюми 21 май дар толори Консерваторияи миллии Тоҷикистон ба номи Т. Сатторов бо консерти идона таҳти унвони “Дунё пур аз ҷавонӣ” давом ёфт.

Дар ин қисмати чорабинӣ Абдулло Раҳмонзода, раиси Кумитаи кор бо ҷавонон ва варзиш, Достизода Миралӣ, ректори Консерваторияи миллии Тоҷикистон ба номи Т. Сатторов, ғолибони озмуни ҷумҳуриявӣ, инчунин гирандагони Стипендияи президантӣ ва ҷавонони касбу кори гуногун иштирок намуданд.

Консерти идона аз ҷониби оркестри эстрадии Консерваторияи миллӣ, ки бахшида ба Рӯзи ҷавонон омода гардида буд, ба таври зинда аз ҷониби ғолибони озмунҳои “Тоҷикистон-Ватани азизи ман”, ки донишҷӯёни Консерваторияи миллӣ ҳастанд, пешкаши иштирокчиён гардонида шуд.

Дар охири барномаи консертӣ як қатор фаъолони Консерваторияи миллӣ бо сипосномаҳои КҶВ қадрдонӣ гардиданд. Ҳамчунин, аз ҷониби ректори Консерватория Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон барои дастгирии пайвастаи ҷавонони эҷодкор бо сипосномаи Консерватория қадрдонӣ гардид.

Рустам ОДИНАЕВ, “ҶТ”