29-уми апрел, дар рӯзи чоруми меҳмонии ҷавонон дар шаҳру навоҳии вилояти Суғд, ки таҳти унвони “Дӯст ояд, гарм дар оғӯш гир!” ҷараён дошт, ҳайати меҳмонон рӯзи худро бо машқҳои пагоҳирӯзӣ дар истироҳатгоҳи “Шоҳин-БМТ” –и шаҳри Гулистон оғоз карда, сипас ба ноҳияи Бобоҷон Ғафуров равон шуданд.

Дар маркази ноҳияи Бобоҷон Ғафуров ҷавононро роҳбарияти шаҳр бо нону намак истиқбол гирифта, аз ташрифи меҳмонон изҳори хушнудӣ карданд. Баъд аз маросими расмии истиқболи меҳмонон, ки бо шукуҳу шаҳомати хосса ҷараён гирифт, ҷавонон аз Қасри Арбоб дидан карданд.

Иштирокчиёни ин меҳмониро дар саҳни ҳавлии Қасри Арбоб, ки дар таърихи Тоҷикистони навин мақоми хос дорад, фаъолон ва намояндагони мақомоти иҷроияи ҳокимияти давлатии ноҳияи Бобоҷон Ғафуров гарму самимӣ истиқбол гирифтанд.

Ҷавонон аз майдону гулгаштҳои ин макони таърихӣ, ки бахшида ба ҷашни 30-солагии Иҷлосияи тақдирсози 16-уми Шурои Олии Ҷумҳурии Тоҷикистон азнавсозӣ гардидааст, боздидро оғоз карданд.

Баъдан, иштирокчиён аз осорхонаи таърихии ин бинои муҳташам, ки ба истиқболи 30-юмин солгарди Иҷлосияи XVI Шурои Олии Ҷумҳурии Тоҷикистон бо маблағгузории мақомоти иҷроияи ҳокимияти давлатии вилояти Суғд пурра навсозӣ карда шудааст, боздид ба амал оварда, бо тамошои аксу ҳуҷҷатҳои таърихӣ аз ҳар рӯзи иҷлосия ва лаҳзаҳои хотирнишини он ёдоварӣ намуданд.

Иттилоъ дода шуд, ки дар толори намоишии “Иҷлосияи XVI Шурои Олии Ҷумҳурии Тоҷикистон” воқеаҳои мудҳиши гирдиҳамоиҳои ғайриқонунии тӯлонӣ, лаҳзаи риққатовари гаҳвораи бетифл, гиряи талхи модар ва кӯдаки маъсуми ӯ аз бадбахтӣ ва фоҷиаи ҷанги таҳмилии шаҳрвандӣ, тарки манзил кардани ҳазорон нафар сокинони мамлакат, вазъи гурезаҳои иҷборӣ ва даҳҳо манзараи ҳузнангези он замон дар аксҳо инъикос ёфтаанд.

Воқеан, Қасри бошукӯҳ ва таърихии Арбоб макони таърихӣ, гаҳвораи эҳёи Тоҷикистони навин, аввалин минбари Пешвои муаззами миллат муҳтарам Эмомалӣ Раҳмон дар роҳи бунёди Тоҷикистони соҳибистиқлол маҳсуб ёфта, барои ҳар як шаҳрванди Тоҷикистон азизу муқаддас аст.

Баъд аз ин ҷавонон аз коргоҳҳои истеҳсолии ин шаҳр боздид ба амал оварданд. Аз ҷумла, аз коргоҳҳои истеҳсолӣ аз корхонаи истеҳсоли халтаҳои полипропиленӣ ва полиэтилении ҶДММ “Ориён Пак” ва як коргоҳи дӯзандагӣ дар ҷамоати деҳоти Овчиқалъачаи ноҳия дидан карданд.

Дар идома дар яке аз тарабхонаҳои маркази ноҳия аз ҷониби мақомоти иҷроияи ҳокимияти давлатии ноҳияи Бобоҷон Ғафуров барои ҷавонон шоми ҷавонӣ ташкил карда шуд.

Сипас, иштирокчиён бо усули хона ба хона ба хонаҳои сокинони ноҳия тақсим шуда, фардои он рӯз – 30 апрел озими пойтахт гардиданд.