Шодрӯз Неъматов хатмкардаи литсей барои хонандагони болаёқат дар шаҳри Хуҷанд мебошад. Ӯ бо иштирок дар гранти байналмилалӣ роҳхати таҳсил дар яке аз донишгоҳҳои Туркияро ба даст овардааст. Мо бо Шодрӯз перомуни иштирок дар гранти байналмилалӣ ва мушкилиҳои дар ин роҳ ҷойдошта суҳбат намудем.

- Омодагии шумо барои ба даст овардани гранти байналмилалӣ чӣ гуна буд?

- Ҳамасола ин гуна грантҳо аз давлатҳои хориҷа ба литсей пешниҳод карда мешаванд. Барои иштирок дар гранти байналмилалӣ омодагии ҷиддӣ гирифта будам. Ҳангоми оғози имтиҳон ман низ дар қатори дигар хонандагон дар он иштирок намудам. Хостам дониши худро боз ҳам сайқал диҳам.

- Оё боварӣ доштед, ки ғолиби гранти байналмилалӣ мегардед?

- Бале, боварӣ доштам. Ҳамавақт шахс бояд ба худаш боварӣ дошта бошад ва ба ҳамон боварӣ бояд худро сазовор донад. Ҳарчанд бори аввал буд, ки дар гранти байналмилалӣ иштирок менамудам, ба худ боварии комил доштам.

- Тарзи супоридани имтиҳон чӣ гуна буд ва дар ин роҳ шуморо киҳо дастгирӣ карданд?

- Имтиҳони гранти байналмилалӣ навиштани эссе буд, ки ман онро бомуваффақият навишта, пешниҳод намудам. Маро дар ин роҳ Сурайё Неъматзода, директор ва Суруш Хуҷаев, яке аз муаллимони литсей ҳамаҷониба дастгирӣ намуданд. Будани онҳо дар канорам ба ман бисёр ҳисси хуб мебахшид. Боварӣ барои ғолиб омадан дар гранти байналмилалиро дар қалбам бештар мекард.

- Дар ин роҳ шумо бо чӣ гуна мушкилот рӯ ба рӯ гаштед?

- Аслан, дар ҳама кор мушкилӣ ҳаст. Дар аввал барои ман бисёр мушкил буд. Зеро чунин грантҳо дар ноҳияҳо пешниҳод намешаванд ва ман бори аввал буд, ки дар он иштирок менамудам. Вақте ки пеши худ мақсад гузоштам ва барои расидан ба он талош кардам, тамоми мушкилиҳо худ аз худ ҳал шуданд.

- Дар кадом озмунҳои ҷумҳуриявӣ иштирок намудаед?

- Дар озмуни ҷумҳуриявии “Фурӯғи субҳи доноӣ...” соли 2021 аз рӯи номинатсияи адабиёти классикӣ иштирок намуда, то ба даври шаҳрӣ расида, сазовори ҷойи аввал гаштам. Дар даври ҷумҳуриявӣ гирандаи ҷои ифтихорӣ ва 5000 сомонӣ мукофотпулӣ бо қарори Президент ва ифтихорномаи Вазорати маориф ва илми Ҷумҳурии Тоҷикистон гардидам. Имсол низ дар ин озмун иштирок карда истодаам. Ҳоло даври шаҳрии он ҷамъбаст гардидааст, ки ҷои аввалро сарфароз гардидам.

Инчунин дар Академияи хурди илмҳо низ бо тавсия ва пешниҳоди Сурайё Неъматзода, директори литсей аз бахши экология иштирок намудам. Дар даврҳои вилоятӣ, шаҳрӣ ва ҷумҳуриявӣ дар мавзӯи “Ифлосшавии муҳити зист аз ҷониби инсон” иштирок намуда, сазовори ҷои аввал гаштам.

Ҳошим РАҲМАТУЛЛОЕВ,
“ҶТ”