Имрӯз, 2 май сардори Раёсати Вазорати корҳои дохилӣ дар ВМКБ, полковники милитсия Бухоризода Мансур Ғоиб бо донишҷӯёну омӯзгорони Донишгоҳи давлатии Хоруғ ба номи Моёншо Назаршоев мулоқот намуд.

Ҳамчунин дар вохӯрӣ намояндагони Раёсати кор бо ҷавонон ва варзиш, ректори донишгоҳ, профессор Шермамад Ҷонмамадов, аҳли зиё ва ҷавонони вилоят ширкат варзиданд.

Ҳадафи мулоқотро Бухоризода М. Ғ. асосан баланд бардоштани маърифати ҳуқуқии муҳассилину ҷавонон арзёбӣ карда, гуфт ки феълан баҳри хештаншиносиву тақвияти маънавиёти ҷавонон аз тарафи Ҳукумати кишвар ва хусусан ВКД чораҳои амалӣ рӯи кор оварда мешаванд:

“Имрӯзҳо ҷавонони кишвар ба ҳамагуна шароиту имконоти моддӣ - маънавии замон дастрасӣ доранд, аммо баҳри дуруст ба кор андохтани онҳо қабл аз ҳама ҷавонон бояд ҳаққу ҳуқуқи хешро донанд ва дар ҷомеа мақоми сазовор дошта бошанд”, - афзуд сардори РВКД.

Ш. Ҷонмамадов, ректори донишгоҳ аз бетаваҷҷуҳии баъзе волидон насибати фарзандони худ изҳори нигаронӣ намуд ва яке аз сабабҳои аслии даст ба ҷиноятҳои ҳархела задани ҷавононро ба он рабт дод:

- Мутаассифона, ҳолатҳое ҷой доранд, ки донишҷӯёни ғоибхон аз беназоратии падару модар сӯистифода карда, даст ба ҷинояткорӣ мезананд, баъдан ба дасти мақомоти қудратӣ меафтанду як умр волидонро доғдор месозанд ва нуфузи донишгоҳро паст мезананд, - гуфт ректор.

Сипас, сӯҳбати озод ба таври саволу ҷавоб байни роҳбарияти донишгоҳ, сардори РВКД ва ҷавонону омӯзгорон ба вуқӯъ пайваст, ки дархосту пешниҳодҳо аз ҷониби тарафайн хуш пазируфта шуд.