Дар шаҳри Истаравшан мулоқоти намояндагони мақомоти иҷроия ва сохторҳои қудратӣ бо ҷавонону наврасон ва варзишгарон дар мавзӯи пешгирии шомилшавии ҷавонон ба ҳизбу ҳаракатҳои террористӣ баргузор шуд.

Мулоқот бо мақсади пешгирии шомилшавии ҷавонон ба ҳизбу ҳаракатҳои террористӣ-экстремистӣ, тарбияи онҳо дар рӯҳияи худогоҳиву худшиносӣ, пешгирии хурофотпарастӣ, таҳкими ваҳдат ва сулҳу субот дар ҷомеа гузаронида шуда, зимни он қайд гардид, ки Ҳукумати Ҷумҳурии Тоҷикистон зери сиёсати сулҳпарваронаи Пешвои миллат муҳтарам Эмомалӣ Раҳмон ҳамеша терроризму экстремизмро қотеъона маҳкум намуда, барои пешгирии ин зуҳуроти номатлуб тадбирҳои зарурӣ меандешад.

Таъкид гардид, ки ҳоло зиёда аз 160 нафар сокинони истаравшанӣ дар кофтукоб буда, панҷ нафар аз онҳо таҳсили ғайрирасмии динӣ дар хориҷа доранд. Ҷумҳурии Тоҷикистон ягона кишваре мебошад, ки Стратегияи миллии мубориза бар зидди экстремизм ва терроризм барои солҳои 2016-2020 ва Нақшаи амал барои татбиқи онро қабул кардааст. Ин далел бори дигар шаҳодат аз он медиҳад, ки мушкилоти мубориза бо ин омилҳои манфӣ барои Ҷумҳурии Тоҷикистон то чӣ андоза ҷиддӣ аст.