20 феврал зимни сафари корӣ Давлаталӣ Саид, раиси вилояти Хатлон дар ноҳияи Кӯшониён аз як майдончаи варзишӣ дар назди Муассисаи таҳсилоти миёнаи умумии №12 боздид намуда, онро расман ба истифода дод. Дар ин бораи хадамоти матбуоти вилояти хатлон хабар медиҳад.

Бино ба иттилои манбаъ, майдончаи варзишӣ дар деҳаи Ҳофизи Шерозии ҷамоати Меҳнатобод бо ташаббуси сокинони деҳаҳои Ҳофизи Шерозӣ ва дастгирии шахсони хайрхоҳ бунёд ёфтааст. Барои сохтмони ин иншоот 312 ҳазор сомонӣ равона гардида, он дар ҳудуди муассисаи таълимӣ ҷойгир мебошад.

Тибқи иттилоъ, майдонча асосан барои машғулияти футбол пешбинӣ шуда, минбаъд ҷавонону наврасони деҳаҳои гирду атрофи ҷамоати деҳоти Меҳнатобод метавонанд аз он ба таври доимӣ истифода намоянд. Иншооти нав имконият медиҳад, ки хонандагон вақти холии худро бо машғулияти муфид сипарӣ карда, қобилияти ҷисмонӣ ва малакаҳои варзишии худро рушд диҳанд.

Яҳё МАҲМАДНАБИЕВ, “ҶТ”