Кумитаи кор бо ҷавонон ва варзиши назди Ҳукумати Ҷумҳурии Тоҷикистон 10 феврал бо иштироки доираи васеи рӯзноманигорон нишасти матбуотии худро доир намуд.

Нишасти матбуотӣ таҳти раёсати Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Шуҳрат Азиззода, намояндаи Дастгоҳи иҷроияи Президенти Ҷумҳурии Тоҷикистон баргузор гардида, зимни он дар баробари намояндагони ВАО, инчунин муовинони раис, ректори Донишкадаи тарбияи ҷисмонии Тоҷикистон ба номи С. Раҳимов ва ҳайати кормандони сохтор ва зерсохтори Кумита иштирок намуданд.

Тавре раиси Кумита изҳор дошт, ҷараёни татбиқи барномаҳои вусъатдори давлатӣ дар самти кор бо ҷавонон собит месозад, ки бояд дар ин ҷода усулҳои нави кор бо насли ҷавон ва тадбирҳои самарабахш таҳия ва амалӣ карда шаванд.

ЧОРАБИНИҲО БО ФАРОГИРИИ МИЛЛИОНҲО НАФАР ҶАВОН

Раиси Кумита зикр намуд, ки соли 2024 аз ҷониби ниҳоди мазкур, сохторҳои маҳаллӣ ва ташкилотҳои система, инчунин Иттифоқи ҷавонони Тоҷикистон дар самти татбиқи сиёсати давлатии ҷавонон 42 ҳазору 534 чорабинӣ бо фарогирии 4 миллиону 263 ҳазору 590 нафар ҷавон ва аҳли ҷомеа баргузор гардид, ки ин нишондиҳанда нисбат ба соли 2023 аз лиҳози теъдоди чорабиниҳо 430 адад ва аз лиҳози фарогирӣ 301 ҳазору 126 нафар зиёд мебошад.

Қайд гардид, ки аз шумораи чорабиниҳои гузаронидашуда 22 ҳазору 120 адад чорабиниҳои хусусияти назариявиядошта дар самти татбиқи сиёсати давлатии ҷавонон бо фарогирии 1 миллиону 324 ҳазору 218 нафар ҷавон ва аҳли ҷамоатчигӣ ва 20 ҳазору 414 корҳои амалӣ (чорабиниҳои гуногуни амалӣ, амсоли конференсияҳо, мизҳои мудаввар, семинарҳои омӯзишӣ, ҳамоишҳо, аксияҳо, аёдат, чорабиниҳои хусусияти ватандӯстидошта, силсилачорабиниҳои маърифатию адабӣ, фарҳангӣ - фароғатӣ, иттилоотию тарғиботӣ дар самтҳои афзалиятноки сиёсати давлатии ҷавонон) ташкил медиҳад, ки дар ин чорабиниҳо 2 миллиону 939 ҳазору 372 нафар иштирок ва ба маълумотҳои зарурӣ фаро гирифта шуданд.

Ҳамзамон, гуфта шуд, ки дар соли 2024 11 ҳазору 26 иншооти варзишӣ, новобаста аз шакли моликияташон, ба қайд гирифта шудааст, ки аз ин 127 варзишгоҳ, 7 ҳазору 662 майдончаи варзишӣ, 2273 толори варзишӣ, 104 ҳавзи шиноварӣ, 89 маҷмаъҳою марказҳои солимгардонӣ, бошгоҳҳои варзишӣ ва 771 иншооти махсуси варзишӣ буда, онҳо фаъолияти пурсамар доранд ва ин шумора нисбати ҳамин давраи соли гузашта 141 адад иншоот зиёд мебошад.

РУШДИ ВАРЗИШИ КАСБӢ

Дар ҷараёни нишасти матбуотӣ иброз гардид, ки тадбирҳои андешида дар самти рушди варзиши касбӣ дар соли 2024 аз ҷониби Кумита ва ташкилотҳои ҷамъиятии федератсияҳои варзишии кишвар 1 126 нафар варзишгар, аз ҷумла 354 бонуи узви дастаҳои мунтахаби Ҷумҳурии Тоҷикистон аз намуди варзиши олимпӣ ва ғайриолимпӣ ба 82 мусобиқаҳои сатҳи байналмилалии варзишӣ сафарбар гардида, дар натиҷа ба хазинаи варзишии кишвар 448 медал, аз ҷумла 134 тилло, 108 нуқра ва 206 биринҷӣ ворид намуданд, ки натиҷаҳои бадастовардаи варзишгарон нисбат ба соли 2023, 87 медал (13 тилло, 22 нуқра ва 52 биринҷӣ) зиёд мебошад.

- Маврид ба зикр аст, ки 448 маротиба Парчами давлатии Ҷумҳурии Тоҷикистон дар мусобиқаҳои сатҳи байналмилалӣ ба шарофати дастоварди варзишгаронамон баланд бардошта шуда, 134 маротиба Суруди миллӣ ба хотири дастоварди онҳо дар мусобиқаҳои сатҳи байналмилалӣ садо додааст, - зикр намуд раиси Кумита.

Гуфта шуд, ки аз ҷониби дастгоҳи марказии Кумита дар доираи Нақшаи ягонаи тақвимии чорабиниҳои тарбияи ҷисмонӣ ва варзиш дар Ҷумҳурии Тоҷикистон барои соли 2024, 145 чорабинии варзиши касбӣ бо фарогирии 13 ҳазору 490 нафар варзишгар, аз ҷумла, 3 714 нафар бонувон баргузор гардид.

ЧАНД ДАСТОВАРДИ ТАЪРИХИИ ВАРЗИШГАРОН

Дар посух ба суолҳои рӯзноманигорон раиси Кумита аз дастовардҳои таърихии варзишгарон гуфта, иброз дошт, ки дар таърихи соҳибистиқлолии кишвар саҳифаи навине боз гардид.

Аз ҷумла, нахустин дастовардҳои варзишгарон дар дохил ва берун аз он чунин арзёбӣ гардид:

- Бори аввал дар кишвар мусобиқаи бонуфузи байналмилалии “Гранд-Слам Душанбе-2024” бо иштироки 446 нафар варзишгар аз 65 давлати ҷаҳон баргузор гардид, ки варзишгаронамон бо ба даст овардани 7 медал, аз ҷумла 1 тилло, 3 нуқра ва 3 биринҷӣ дар зинаи панҷуми кишварҳои иштирокчӣ қарор гирифтанд;

- Бори нахуст варзишгаронамон дар таърихи соҳибистиқлолии кишвар аз рӯи намуди футзал ба марҳилаи нимниҳоии чемпионати Осиё роҳ ёфта, роҳхат ҷиҳати иштирок дар Чемпионати ҷаҳон оид ба футзалро дарёфт намуданд;

- Бори аввал дар таърихи соҳибистиқлолии Тоҷикистони маҳбуб футзалбозони тоҷик дар Чемпионати ҷаҳон иштирок карданд;

- Бори нахуст 6 нафар варзишгари тоҷик аз риштаи ҷудо роҳхати Бозиҳои тобистонаи олимпии Париж 2024-ро соҳиб гардиданд, ки дар таърихи ҷудои варзишии кишвар беназир аст;

- Бори аввал дар кишвар Чемпионати ҷаҳон оид ба гӯштингирӣ бо иштироки хоссаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва варзишгарон аз 62 давлати ҷаҳон баргузор гардид, ки ин рӯйдод дар таърихи варзишии кишварамон саҳифаи навро боз намуд;

- Нахустин маротиба дар таърихи варзишии кишвар Чемпионати ҷаҳон оид ба ҷудо байни ҷавонон доир гардид, ки дар он зиёда аз 800 нафар меҳмонону варзишгарон аз 63 кишвари ҷаҳон иштирок намуданд;

- Бори нахуст дар кишвар Чемпионати ҷаҳон оид ба варзиши сайёҳӣ баргузор гардид;

- Муштзанони навраси тоҷик бори нахуст дар Чемпионати Осиё иштирок намуда, ба хазинаи варзишии кишвар 11 медал, аз ҷумла 4 тилло, 1 нуқра ва 6 биринҷиро ворид сохтанд;

- Бори нахуст муштзанони бомаҳорати тоҷик дар Чемпионати Осиё оид ба бокс байни калонсолон иштирок карда, ба хазинаи варзишии кишвар 5 медал, аз ҷумла 1 тилло, 1 нуқра ва 3 биринҷиро ворид намуданд;

- Варзишгарон аз Бозиҳои тобистонаи олимпии Париж-2024 3 медали биринҷиро ба хазинаи варзишии кишвар ворид намуданд, ки ин дар таърихи соҳибистиқлолии Тоҷикистон бори аввал мебошад;

- Бори аввал аъзои дастаи мунтахаби бонувони Тоҷикистон оид ба волейбол ҷиҳати иштирок дар Чемпионати Осиё роҳхат гирифтанд.

Дар маҷмуъ, натиҷаҳои болозикр нишон дод, ки дар соли 2024 дар тамоми самтҳои фаъолияти Кумита 90 ҳазору 945 чорабинӣ бо фарогирии 8 миллиону 684 ҳазору 795 нафар ҷавон ва аҳли ҷомеа, варзишгарон, иштирокчиён ва мухлисони чорабиниҳои варзишӣ доир шудааст, ки ин нишондиҳанда нисбат ба соли 2023 аз лиҳози теъдоди чорабинӣ 392 адад ва ё 1% ва аз лиҳози теъдоди фарогирӣ 75 ҳазору 819 нафар ё 1% зиёд мебошад.

Фарзонаи УМАРАЛӢ, “ҶТ”