Имрӯз, 1 март, дар Донишгоҳи давлатии тиббии Тоҷикистон ба номи Абӯалӣ ибни Сино чорабинии ҷумҳуриявӣ таҳти унвони “Дар меҳмонии ректор”, ки он бо ибтикори Кумитаи кор бо ҷавонон ва варзиш роҳандозӣ гардидааст, баргузор гардид.

Меҳмонон ва иштирокчиёни чорабинии мазкур, ки беш аз сад нафар ҷавонону донишҷӯёни макотибҳои олии кишварро дар бар мегирифт, аввалан дар саҳни бинои донишгоҳ бо самимияти махсус пешвоз гирифта шуда, баъдан онҳоро бо дастовардҳои ДДТТ ба номи Абӯалӣ ибни Сино ва бо осорхонаи донишгоҳ шинос намуданд.

Сипас, дар доираи чорабинии мазкур дар толори донишгоҳ бо иштироки намояндагон аз Кумитаи кор бо ҷавонон ва варзиш, Вазорати маориф ва илм, Кумитаи рушди сайёҳӣ, меҳмонон ва донишҷӯёни муассисаи таълимии мазкур Форуми ҷавонон дар мавзӯи “Ҷавонон ва ҷомеаи муосир” бахшида ба “Соли рушди сайёҳӣ ва ҳунарҳои мардумӣ”доир гардид.

Гулзода Маҳмадшоҳ Қурбоналӣ, ректори ДДТТ ба номи Абӯалӣ ибни Сино форуми мазкурро ифтитоҳ бахшида, ҳамаи меҳмононро ба донишгоҳи мазкур хайрамақдам гуфт.

Зимни форум доир ба масъалаи ҷавонони кишвар андешарониҳо сурат гирифта, таъкид гардид, ки бояд ҷавонон имрӯз аз тамоми шароитҳои фароҳам овардаи роҳбарияти олии мамлакат самаранок истифода бурда, дониш омӯзанд ва бо аз бар намудани касбу ҳунарҳои гуногун саҳми арзандаи хешро дар рушди минбаъдаи кишвари азизамон – Тоҷикистон гузоранд.

Чорабинии ҷумҳуриявии таҳти унвони “Дар меҳмонии ректор” дар ДДТТ ба номи Абӯалӣ ибни Сино ду рӯз идома ёфта, дар доираи он баробари бо раванди таҳсил ва фаъолияти илмии донишҷӯёни ДДТТ ба номи Абӯалӣ ибни Сино шинос шудани иштирокчиён, инчунин Мизи мудаввар таҳти унвони “Роҳҳои беҳтарсозии ҳамкориҳои байналмилалӣ фаъолияти шуъбаҳои кор бо ҷавонон” бо иштироки сардорони шуъбаҳои кор бо ҷавонони донишгоҳҳо баргузор мегардад.