Ҷалби донишҷуён ва омӯзгорони хориҷӣ ба Донишгоҳи давлатии тиҷорати Тоҷикистон яке аз самтҳои назарраси фаъолияти донишгоҳ дар бахши робитаҳои байналмилалӣ ба ҳисоб меравад.
Дар ин бора ректори донишгоҳ Ҳамидуллохон Фақеров зимни нишасти матбуотӣ, ки 30-юми январи соли равон баргузор шуд, ба хабарнигорон иттилоъ дод.

Ӯ гуфт, ҳоло дар Донишгоҳи давлатии тиҷорати Тоҷикистон беш аз 84 нафар шаҳрвандони мамлакатҳои хориҷӣ дар бахши бакалавр, магистатура, аспирантура ва докторантура таҳсил доранд.

Бар иловаи ин Ҳ. Фақеров зикр кард, ки ҳамкории донишгоҳ бо мактабҳои олии кишварҳои хориҷӣ дар сатҳи хубу самарабахш ба роҳ монда шудааст. “Аз ҷумла ДДТТ бо Донишгоҳи Пизаи Ҷумҳурии Италия созишномаҳои ҳамкориро барои солҳои 2017-2020 ба имзо расонд, ки тибқи он 15 квота барои донишҷӯён дар бахши бакалавр, магистратура ва доктор PhD, инчунин таҷрибаомӯзии омӯзгорон муҳайё шудааст”,- афзуд ректори ДДТТ.

Зикр шуд, ки таҳсили донишҷӯёни тоҷик дар донишгоҳҳои Федератсияи Русия ва Ҷумҳурии Корея низ тибқи ҳамкориҳои дуҷониба ба роҳ монда шудааст.