Таҳрик додани пешрафту шукуфоии давлату миллат дар ҳама давру замон ба таълиму тарбияи насли ҷавон пайванди ногусастанӣ дошту дорад. Маҳз дар ҳоли ба таълиму тарбия фаро хондани насли ҷавон кишвардорон умед ба фардои дурахшони давлат ва бақои миллат мебанданд.

Ҳукумати Ҷумҳурии Тоҷикистон таҳти Роҳбари дурандеш ва нуктасанҷаш – Эмомалӣ Раҳмон аз рӯзҳои аввали соҳибистиқлолӣ сиёсати давлатии ҷавононро дар мадди аввал гузошта, баҳри ба таълиму тарбия фаро хондани ин қишри ояндасоз тамоми чораҳои заруриро равона сохт. Мояи шодиву нишоти ҳар ҷавони кишвар аст, ки маҳз дар замони соҳибистиқлолии Ватани маҳбуб бо ибтикори наҷиб ва ҳадафҳои дурнигаронаи Пешвои миллат, муҳтарам Эмомалӣ Раҳмон ба масъалаи дастгирии давлатии ҷавонон таваҷҷуҳи бештар зоҳир гардида, баҳри муҳайё намудани шароити мусоиди таҳсил ва ҷалби бештари ҷавонон ба кору фаъо­лияти назаррас қадамҳои шоиста гузошта мешавад. Имрӯзҳо дар пайравӣ бо сиёсати пешгирифтаи Пешвои миллат, дар тамоми вазорату муассиса ва ташкилоту идораҳои кишвар масъулин баҳри омӯзонидани донишҳои лозима барои ҷавонон тамоми донишу маллака ва қувваи худро сарф намуда истодаанд. Фаъолияти ҳамарӯзаи бахшҳои кор бо ҷавонон ва варзиш дар назди ҳукумати ноҳияҳо ва шуъбаҳои кор бо ҷавонон дар донишгоҳу донишкадаҳои кишвар баёнгари таваҷҷуҳ ба таълиму тарбияи насли наврас ва гом бардоштан дар сиёсати пешгирифтаи Пешвои муаззами миллат мебошад.

Шуъбаи кор бо ҷавонони Донишгоҳи миллии Тоҷикистон аз замони аввали истиқлолият бо фаъолияти пурсамари худ ва кор бо ҷавонони донишгоҳ миёни дигар муассисаҳои давлатӣ пешсаф мебошад. Шуъбаи кор бо ҷавонони ДМТ фаъолияти худро дар асоси Конститутсияи Ҷумҳурии Тоҷикистон, санадҳои меъёрии ҳуқуқӣ, Фармону амрҳои Президенти кишвар, Қонуни Ҷумҳурии Тоҷикистон “Дар бораи ҷавонон ва сиёсати давлатии ҷавонон”, Оинномаи ДМТ, қарору фармоишҳои Шӯрои олимон ва раёсати донишгоҳ ба роҳ монда, дар самти пешбурди сиёсати давлатии ҷавонон ҳамасола дар донишгоҳ, як қатор корҳоро ба анҷом мерасонад. Аз ҷумла соли ҷорӣ, ки аз сӯи Асосгузори сулҳу ваҳдати миллӣ-Пешвои миллат, муҳтарам Эмомалӣ Раҳмон “Соли ҷавонон” эълон гардид, Шуъбаи кор бо ҷавонони донишгоҳ бо мақсади дар сатҳи баланд ташкил ва баргузор намудани чорабиниҳо нақшаи чорабиниҳоро бо назардошти “Нақшаи чорабиниҳои ягонаи Шӯрои мудирони шуъбаҳои кор бо ҷавонони муассисаҳои таҳсилоти олии касбӣ барои соли 2017” қабул намуд.

Ба гуфтаи мудири Шуъбаи кор бо ҷавонони донишгоҳ Раҷабалӣ Икромов Шуъбаи кор бо ҷавонони ДМТ зери роҳбарии ректори донишгоҳ академик Имомзода М.С дар қатори дигар донишгоҳҳои мамлакат як қатор корҳои назаррасро бахшида ба “Соли ҷавонон” ба анҷом расонид, ки ҳоло ин охири кор нест.

Танҳо дар давоми се моҳи аввали соли 2017 аз ҷониби раёсати донишгоҳ вобаста ба эълон гардидани “Соли ҷавонон” дар 594 гурӯҳи академии факултетҳо оиди эълон гардидани “Соли ҷавонон” бо иштироки устодону кормандони донишгоҳ ва мутахассисони соҳаи кор бо ҷавонон суҳбату вохӯроиҳо гузаронида шуд. Аз рӯзи аввали соли 2017, дақиқан якуми январ дар майдони 800-солагии Москва Аксияи ҷумҳуриявӣ бахшида ба соли 2017- “Соли ҷавонон” баргузор гардид. Дар чорабинии мазкур аз донишгоҳ 25 нафар донишҷӯён бо шиору овезаҳо ва парчамҳо иштирок намуданд. Мудири шуъба аз рафти дигар чорабиниҳо чунин ибрози андеша намуд: “Албатта корҳои назаррас дар соли ҷорӣ дар донишгоҳ хело зиёданд. Масалан, дар олимпиадаи байналмилалӣ аз фанни математика, ки аз 22-юм то 24-уми феврали соли ҷорӣ дар Донишгоҳи Белорусияву Русияи шаҳри Могилёви Ҷумҳурии Белорусия баргузор гардид, ду донишҷӯ – Собирҷон Бобиев- донишҷӯи курси 2-юми факултети механикаю математика ва Некрӯз Гадоев – донишҷӯи курси 2-юми факултети мазкур ДМТ-ро намояндагӣ мекарданд. Дар олимпиадаи мазкур донишҷӯён аз кишварҳои Белорусия, Русия, Чехия, Полша, Ӯзбекистон, Эрон, Тоҷикистон ва ғ. ширкат намуданд. Дар ин олимпиада Собирҷон Бобиев сазовори ҷойи 3-юм ва медали биринҷӣ гардид. Ҳамчунин, бояд гуфт, ки маҳз бахшида ба “Соли ҷавонон” ва 24-умин солгарди таъсисёбии Артиши миллӣ дар кафедраи ҳарбии Донишгоҳи миллии Тоҷикистон синфхонаи нави таълимӣ муҷаҳҳаз бо технологияи ҳозиразамон кушода шуд. Ректори донишгоҳ, академик Имомзода М.С. дар суҳбат бо донишҷӯёну кормандони кафедра иброз дошта буд, ки синфхонаи мазкур беҳтарин туҳфа дар арафаи “Соли ҷавонон” ба донишҷӯёну афсарони кафедра мебошад”.

Татбиқи “Барномаи давлатӣ оид ба пешгирии зӯроварӣ дар оила дар Ҷумҳурии Тоҷикистон барои солҳои 2014 – 2023” миёни донишҷӯён, иштирок баргузории мусобиқаи кушоди варзишӣ аз рӯи намудҳои гӯштини миллӣ, шиноварӣ, дар байни бонувон ва байни мардон, шашкаю шоҳмот барои дарёфти “Ҷоми Вазири корҳои дохилии Ҷумҳурии Тоҷикистон” аз 23 январ то 11 феврали соли 2017 дар толори Маҷмааи варзишии ШҶ “Динамо”-и Вазорати корҳои дохилии Ҷумҳурии Тоҷикистон, доир намудани чорабинии идона бахшида ба Рӯзи модарон–8-уми март дар толори калони донишгоҳ, ташкил намудани корҳои сохтмонию ободонӣ, таъмири биною иншоот, тоза намудани гирду атрофи идораҳо, объектҳои иҷтимоию маишӣ, маҳалли зист, кӯчаю хиёбонҳо, ниҳолшинонӣ, кабудизоркунӣ, обод намудани гулгаштҳо ва боғҳои истироҳатию фароғатӣ дар доираи эълон гардидани 150 рӯзи ободонӣ дар пойтахти кишвар бо ташаббуси донишгоҳ, баргузории озмуни маърифатӣ-зеҳнии “Арӯси наврӯзӣ” бо мақсади тарбияи самарабахши ҷавондухтарон дар рӯҳияи худшиносиву илмгароӣ, одоби оиладорӣ, дастгирӣ ва ҳавасмандгардонии донишҷӯдухтарон ва даҳҳо чорабиниҳои дигар далолат аз он мекунанд, ки масъулини Шуъбаи кор бо ҷавонони ДМТ зери роҳбарияти донишгоҳ дар роҳи таълиму тарбияи ҷавонон саҳми бориз дорад.

Хуршед МАВЛОН, “ҶТ”